पालिकेत नोकरी लावतो सांगून अडीच लाखांचा गंडा

पालिकेत नोकरी लावतो सांगून अडीच लाखांचा गंडा
ठाण्यातील सफाई कामगाराची फसवणूक
सकाळ वृत्तसेवा
ठाणे, ता. १७ : महापालिकेत सफाई कामगार म्हणून बहिणींना नोकरी लावतो, असा बनाव करून एका सफाई कामगाराकडून अडीच लाखांची फसवणूक केल्याचा प्रकार उघडकीस आला आहे. याप्रकरणी किरण गोसावी नावाच्या व्यक्तीविरोधात वर्तकनगर पोलिस ठाण्यात फसवणुकीचा गुन्हा दाखल करण्यात आला आहे.

फसवणूक झालेल्या व्यक्तीचे नाव गणेश जाधव (३५, रा. साठेनगर) असे असून ते स्वतः सफाई कामगार आहेत. त्यांच्या दोन बहिणींना नोकरीची गरज होती. याच दरम्यान गणेश यांचा मित्र मोहम्मद खुर्शिद ऊर्फ पप्पू याने त्यांची ओळख किरण गोसावी याच्याशी करून दिली. त्या वेळी गोसावी याने स्वतःला मंत्रालयात काम करत असल्याचे भासवून दोन्ही बहिणींना ठाणे महापालिकेत सफाई कामगारपदावर नोकरी लावून देण्याचे आश्वासन दिले.

गोसावी याने प्रत्येकी तीन लाख रुपये म्हणजे एकूण सहा लाखांची मागणी केली. जाधव कुटुंबीयांनी घरातील दागिने गहाण ठेवून ६ सप्टेंबर २०२४ रोजी अडीच लाख रुपये रोख स्वरूपात गोसावी याला वर्तकनगर प्रभाग समिती कार्यालयात दिले. उर्वरित रक्कम गोसावीच्या बँक खात्यात जमा केली. पैसे दिल्यानंतर गोसावी याने दोन दिवसांत काम होईल, असे सांगितले; मात्र काही दिवसांनी त्याचा फोन बंद येऊ लागला. जाधव यांनी पैसे मागितले असता गोसावी याने जुलै २०२५ मध्ये साडेतीन लाख रुपये परत केले; मात्र उर्वरित रक्कम आणि नोकरी दोन्हीही न दिल्याने फसवणूक झाल्याचे लक्षात आल्यावर त्यांनी वर्तकनगर पोलिसांत तक्रार दाखल केली. याप्रकरणी पोलिसांनी गुन्हा दाखल केला आहे. पुढील तपास वरिष्ठ पोलिस निरीक्षक राजकुमार वाघचौरे यांच्या मार्गदर्शनाखाली सुरू आहे.