पुनर्वापरित प्लास्टिकच्या झाकणांपासून पर्यावरणपूरक तिरंगा फलक

पुनर्वापरित प्लॅस्टिकच्या झाकणांपासून पर्यावरणपूरक तिरंगा फलक
नेरूळ, ता. १७ (बातमीदार) ः प्लॅस्टिकमुक्त नवी मुंबई ही संकल्पना प्रत्यक्षात येण्यासाठी नागरिकांनी योगदान द्यावे याकरिता नवी मुंबई पालिकेने प्रोजेक्ट मुंबई या स्वयंसेवी संस्थेशी सामंजस्य करार केला आहे. यानुसार नवी मुंबईत प्लॅस्टिक आणि ई-वेस्ट रिसायक्लोथॉन हा अभिनव उपक्रम राबविण्यात येत आहे. या व्यापक स्वरूपातील उपक्रमामध्ये पुनर्वापर केलेल्या प्लॅस्टिकमधून विविध उपयोगी वस्तू बनविण्यात येऊन थ्री-आर सूत्रांनुसार प्लॅस्टिकचा पुनर्वापर केला जात आहे.
अशाप्रकारे प्लॅस्टिक बाटल्यांच्या झाकणांवर पुनर्प्रक्रिया करून त्यापासून तयार केलेल्या तिरंगा फलकाचे स्वातंत्र्यदिनानिमित्त अनावरण महापालिका आयुक्त डॉ. कैलास शिंदे यांच्या हस्ते झाले.
याप्रसंगी अतिरिक्त आयुक्त सुनील पवार व डॉ. राहुल गेठे, प्रशासन विभागाचे उपायुक्त भागवत डोईफोडे, शहर अभियंता शिरीष आरदवाड, मुख्य लेखा व वित्त अधिकारी सत्यवान उबाळे, घनकचरा व्यवस्थापन विभागाचे उपायुक्त डॉ. अजय गडदे व स्मिता काळे, अतिरिक्त शहर अभियंता अरविंद शिंदे आणि इतर विभागप्रमुख व अधिकारी उपस्थित होते.
दोन हजार ४६० पुनर्वापरित प्लॅस्टिकच्या झाकणांपासून तयार केलेला हा तिरंगा फलक महापालिकेच्या मुख्यालयाच्या आवारातच प्रदर्शित करण्यात येणार आहे.