कळमजेतील तरुणांचा जल्लोष

कळमजेतील तरुणांचा जल्लोष
माणगांव, ता. १७ (वार्ताहर) ः माणगाव तालुक्यातील कळमजे गावाने यावर्षी दहीहंडी उत्सव अतिशय उत्साहात, श्रद्धेने आणि पारंपरिक जल्लोषात साजरा केला. गावातील देवा प्रतिष्ठानने आयोजित केलेल्या या सोहळ्यास ग्रामस्थ, महिला, तरुणाई आणि ज्येष्ठ नागरिक मोठ्या संख्येने उपस्थित होते. गोविंदा रे गोपाळाच्या गजरात आणि ढोल-ताशांच्या निनादात पार पडलेला हा उत्सव ग्रामस्थांच्या मनात कायमचा घर करून गेला.
या वेळी शेतकरी नेते पंकज तांबे यांनी हातात गदा घेऊन गावकऱ्यांसोबत जल्लोषात भाग घेतला. ज्याच्या घरात नाही पाणी, घागर उताणी रे गोपाळा, असा जयघोष करत त्यांनी ग्रामस्थांमध्ये एक वेगळाच उत्साह निर्माण केला. त्यांच्या उपस्थितीमुळे वातावरणात ऊर्जा निर्माण झाली. त्यांनी तरुणांना एकत्र येऊन सामाजिक कार्यात पुढाकार घ्यावा, असे आवाहन केले. ही दहीहंडी फोडण्यासाठी शिवगर्जना मित्र मंडळ, देवा प्रतिष्ठान आणि गावातील अनेक प्रतिष्ठित नागरिकांचा सहभाग होता. पावसातही गोविंदांनी पाच थर रचत ११ हजार रुपयांची दहीहंडी फोडली. कार्यक्रमानंतर पंकज तांबे यांचा ग्रामस्थांनी विशेष सत्कार केला. त्यांनी गावकऱ्यांचे मनापासून आभार मानले व दहीहंडी उत्सव हा केवळ परंपरेचा भाग नसून तो एकतेचा आणि तरुणाईच्या जिद्दीचा प्रतीक असल्याचे सांगितले.