महापे एमआयडीसीत विजेचा खांब कोसळला

महापे एमआयडीसीत विजेचा खांब कोसळला
तुर्भे, ता. १९ (बातमीदार) ः महापे एमआयडीसी परिसरात मुसळधार पावसामध्ये विजेचा खांब कोसळल्याची घटना घडली. सध्या पावसाळी हवामान असल्याने रात्रीच्या वेळी कर्मचाऱ्यांची अडचण होत आहे. त्‍यामुळे येथील जोडरस्‍त्‍यावरील विजेच्या खांबांची तात्‍काळ दुरुस्‍ती करण्यात यावी, अशी मागणी स्‍थानिकांकडून करण्यात येत आहे.
येथील एका खासगी कार्यालयासमोरील जोडरस्‍त्‍यावर उभारलेला विद्युत खांब अचानक कोसळून रस्त्यावर पडला. सुदैवाने घटना रात्री घडल्यामुळे कोणतीही जीवितहानी झाली नाही. दरम्यान, या दिव्याच्या विद्युत तारा अनेक तास रस्त्यावर उघड्याच पडून होत्या. त्यामुळे परिसरात वावरणाऱ्या नागरिकांना विद्युत धक्क्याचा मोठा धोका निर्माण झाला होता. विशेष म्हणजे या दिव्याच्या खांबावर नवी मुंबई महापालिका व नवी मुंबई पोलिस विभागाचे सीसीटीव्ही कॅमेरे बसवण्यात आले होते. हे कॅमेरेदेखील खांबासोबत रस्त्यावर कोसळले. विशेष म्‍हणजे २४ तासांमध्ये संबंधित विभागाला याची माहितीदेखील नव्‍हती, ही बाब अधिकच धक्कादायक आहे. या घटनेनंतर पश्चिम महाराष्ट्र एकता मंचचे अध्यक्ष योगेश चव्हाण यांनी नवी मुंबई महापालिकेवर तीव्र शब्दांत टीका केली. नवी मुंबई महापालिका क्षेत्रातील सर्व विद्युत खांबांचे स्ट्रक्चरल ऑडिट तात्काळ करण्यात यावे आणि जीर्ण खांबांची दुरुस्ती करून नागरिकांच्या जीवाशी होणारा खेळ थांबवावा, अशी मागणी त्यांनी केली आहे.