नशामुक्त भारत अभियानांतर्गत पोलिसांची जनजागृती

नशामुक्त भारत अभियानांतर्गत पोलिसांची जनजागृती
शाळा, महाविद्यालयात रॅलीसह पोस्टर्सद्वारे युवकांना संदेश
नवी मुंबई, ता. १७ (वार्ताहर) : केंद्र शासनाच्या नशा मुक्त भारत अभियान, उपक्रमांतर्गत पोलिस महासंचालक कार्यालयाने १५ व १६ ऑगस्ट रोजी राज्यातील सर्व पोलिस ठाणे तसेच अमली पदार्थ विरोधी पथकांना जनजागृती उपक्रम राबविण्याचे आदेश दिले होते. त्यानुसार नवी मुंबई पोलिस आयुक्तालयाच्यावतीने विविध शाळा, महाविद्यालये, सोसायट्या व सार्वजनिक ठिकाणी मोठ्या प्रमाणावर अमली पदार्थ विरोधी जनजागृती करण्यात आली.
या अभियानाचा भाग म्हणून नवी मुंबईतील सर्व पोलिस ठाण्यांनी आपल्या हद्दीत जनजागृती मोहीम हाती घेतली. शाळा-महाविद्यालयांमध्ये विद्यार्थ्यांना अमली पदार्थांचे दुष्परिणाम, त्यापासून होणारे शारीरिक-मानसिक नुकसान, तसेच त्यापासून दूर राहण्याचे महत्त्व याबाबत मार्गदर्शनपर व्याख्याने घेण्यात आली. त्याचबरोबर विद्यार्थी व शिक्षकांनी मिळून रॅली काढत ड्रग्सला नाही म्हणूया, आरोग्यदायी जीवन जगूया असे घोषवाक्ये दिली.
रेल्वे स्थानके, मॉल्स, गर्दीचे चौक आदी भागात बॅनर्स व पोस्टर्स लावून नागरिकांना नशामुक्तीचा संदेश देण्यात आला. दहीहंडी उत्सवाचे औचित्य साधूनही युवकांना व्यसनमुक्त राहण्याचे आवाहन करण्यात आले. या उपक्रमाद्वारे हजारो विद्यार्थी व नागरिकांपर्यंत पोलिस प्रशासनाने व्यसनमुक्तीचा संदेश पोहोचवला. नवी मुंबई पोलिसांनी केलेल्या या जनजागृती मोहिमेला स्थानिक नागरिक, शाळा-विद्यालय प्रशासन तसेच सामाजिक संस्थांचा उत्स्फूर्त प्रतिसाद मिळाला. नवी मुंबई पोलिस आयुक्तालयाने या अभियानाद्वारे युवकांनी व्यसनाच्या विळख्यात अडकू नये व समाज नशामुक्त राहावा, यासाठी सातत्याने प्रयत्न करण्याचा निर्धार व्यक्त केला आहे.