मुंबई कृषी उत्पन्न बाजार समितीवर प्रशासक राजवट?

मुंबई कृषी उत्पन्न बाजार समितीवर प्रशासक राजवट?
१५ दिवसांनी संपणार संचालक मंडळाचा कार्यकाळ
तुर्भे, ता. १७ (बातमीदार) : मुंबई कृषी उत्पन्न बाजार समिती संचालक मंडळाच्या निवडणुकीसाठी मागील दीड महिन्यांपासून मतदार याद्यांवर ठाणे तथा जिल्हा उपनिबंधक सहकारी संस्था ठाणे यांच्या वतीने खलबते कुटली जात आहेत. दुसरीकडे विद्यमान संचालक मंडळाचा कार्यकाळ संपायला अवघे १५ दिवस शिल्लक राहिल्याने निवडणूक कार्यक्रम जाहीर झाला नाही. त्यामुळे वेळेत संचालक मंडळाची निवडणूक न घेता बाजार समितीवर प्रशासक राजवट आणून गाडा हाकण्याची शक्यता एका संचालकाने नाव न सांगण्याच्या अटीवर व्यक्त केली आहे.
नवी मुंबई शहरात सध्या पुनर्विकासाचे वारे वाहत आहेत. अशातच मुंबई कृषी उत्पन्न बाजार आवारातील इमारतीदेखील धोकादायक झाल्या असून त्यांचा पुनर्विकास प्रस्तावित आहे. सर्वात प्रथम कांदा-बटाटा मार्केटचा पुनर्विकास होणार आहे. त्यामुळे बाजार समितीच्या १७५ एकर जागेवर पुनर्विकास होणार असल्याने विकसकांसह राजकारण्यांच्या नजरा याकडे वळल्या आहेत. अशातच मुंबई कृषी उत्पन्न बाजार समिती संचालक मंडळाचा पंचवार्षिक कार्यकाळ रविवारी (ता. ३१) संपुष्टात येणार आहे. त्यामुळे नवीन संचालक निवडीसाठी निवडणूक प्रकिया सुरू करण्याच्या सूचना राज्य सहकारी निवडणूक प्राधिकरणच्या सचिवांनी जिल्हा निवडणूक अधिकारी (कृ.ऊ.बा.स.) ठाणे तथा जिल्हा उपनिबंधक सहकारी संस्था ठाणे यांना १ जुलैला दिल्या आहेत; मात्र या सूचना देऊन दीड महिना होत आला तरी निवडणुकीबाबत काहीच हालचाली सुरू नाही. फक्त मतदारयादीवर काम सुरू असल्याचे निवडणूक अधिकाऱ्यांकडून सांगितले जात आहे.

निवडणूक प्रक्रिया सुरू करा!
राज्य सहकारी निवडणूक प्राधिकरणच्या सचिवांनी १ जुलै २०२५ रोजी निवडणूक प्रकिया सुरू करण्याचे पत्र दिल्यानंतर लवकरच संचालक मंडळाची निवडणूक लागेल, अशी आशा बाजार घटकांना होती; मात्र मागील दीड महिन्यापासून निवडणुकीबाबत काहीच हालचाली होताना दिसत नाहीत. त्यामुळे राज्यात सध्या स्थानिक स्वराज्य संस्थांत सुरू असलेला एकहाती प्रशासकीय राजवटीचा अनुभव पाहता मुंबई कृषी उत्‍पन्न बाजार समितीमध्येदेखील याचाच कित्ता गिरवला जातोय, याकडे साऱ्यांचे लक्ष लागले आहे.