छायाचित्र प्रदर्शन, कार्यशाळा

ठाण्यात छायाचित्र प्रदर्शनाचे आयोजन
छायाचित्रण तंत्र- माहिती विषयावर मोफत कार्यशाळा
ठाणे, ता. १७ (बातमीदार) : जागतिक छायाचित्रणदिनाच्या निमित्ताने ठाण्यात एक खास छायाचित्र प्रदर्शन आयोजित करण्यात आले आहे. ठाणे जिल्हा माहिती कार्यालय, वेसाक इंडिया आणि शटर अँड लाइट क्रिएशन्स यांच्या संयुक्त विद्यमाने हे प्रदर्शन भरविण्यात येत आहे. हे प्रदर्शन ज्येष्ठ वृत्तपत्र छायाचित्रकार प्रफुल गांगुर्डे यांच्या निवडक छायाचित्रांचे असणार आहे. यामध्ये विविध विषयांवर त्यांनी क्लिक केलेली उत्कृष्ट छायाचित्रे पाहता येतील.
या प्रदर्शनाचे उद्घाटन मंगळवारी (ता. १९) सकाळी साडेअकरा वाजता जिल्हा माहिती अधिकारी मनोज सानप आणि पर्यावरण अभ्यासक तथा वृक्षपुरुष विजयकुमार कट्टी यांच्या हस्ते होणार आहे. हे छायाचित्र प्रदर्शन मंगळवार ते शुक्रवार (ता. २२) या कालावधीत सकाळी साडेदहा ते संध्याकाळी सहा वाजेपर्यंत ठाणे जिल्हा माहिती कार्यालय, टेरेस गार्डन, एसबीआय बँकेच्या वर, जिल्हाधिकारी कार्यालयाचे आवार, ठाणे (पश्चिम) या ठिकाणी नागरिकांसाठी आणि छायाचित्रप्रेमींसाठी विनामूल्य खुले असणार आहे.
या उपक्रमाच्या निमित्ताने वृत्तपत्र छायाचित्रकारांचा सत्कार आणि कार्यशाळेचे आयोजन करण्यात आले असून या कार्यक्रमात ठाणे शहरात गेल्या १५ वर्षांपासून वृत्तपत्र छायाचित्रकार म्हणून कार्यरत असलेल्या छायाचित्रकारांचा विशेष सत्कार करण्यात येणार आहे. याशिवाय शुक्रवारी सकाळी साडेअकरा वाजता छायाचित्रणाचे तंत्र आणि माहिती या विषयावर एक मोफत कार्यशाळा आयोजित करण्यात आली आहे. शटर अँड लाइट क्रिएशन्सच्या माध्यमातून ही कार्यशाळा होईल. या कार्यशाळेत सहभागी होण्यासाठी नोंदणी करणे आवश्यक आहे. त्यासाठी एक गुगल फॉर्म लिंक लवकरच उपलब्ध करून दिले जाईल.