ठाण्यातून मुख्यमंत्र्यांना एक लाख राख्या

ठाण्यातून मुख्यमंत्र्यांना एक लाख राख्या
रक्षाबंधन अभियानात मंत्री नाईक यांच्याकडे सुपूर्द
सकाळ वृत्तसेवा
ठाणे, (ता. १७) : उपमुख्यमंत्री एकनाथ शिंदे यांचा गड समजल्या जाणाऱ्या ठाणे जिल्ह्यातून मुख्यमंत्री देवेंद्र फडणवीस यांना एक लाख लाडक्या बहिणींनी राख्या पाठवल्या आहेत. वनमंत्री गणेश नाईक यांच्याकडे या राख्या रविवारी सुपूर्द करण्यात आल्या. महाराष्ट्रातील महिला मनापासून मुख्यमंत्री देवेंद्र फडणवीस यांच्या पाठीमागे उभ्या असल्याने त्यांचे कार्य अधिक प्रकाशमान होईल, असा विश्वास या वेळी त्यांनी व्यक्त केला.
रविवारी (ता. १७) ऑगस्टला भाजप ठाणे विभागीय कार्यालय येथे रक्षाबंधन महाअभियानअंतर्गत ठाणे विभागातून मुख्यमंत्री देवेंद्र फडणवीस यांच्यासाठी बहिणींनी पाठवलेल्या राख्या वनमंत्री गणेश नाईक ह्यांना सुपूर्द करण्याचा कार्यक्रम पार पडला. या कार्यक्रमात बोलताना वनमंत्री गणेश नाईक म्हणाले की, कोणी काही केले नाही, असे म्हणणे उचित होणार नाही, मात्र पंतप्रधान नरेंद्र मोदींच्या नेतृत्वाखाली देश समृद्धीकडे चाललेला आहे. शिक्षण, आरोग्य विभाग या सर्वच क्षेत्रात देश पुढे चालला आहे.

चौकट
बहिणींना आवाहन
भिवंडी, पालघर, वसई, विरार, ठाणे, कल्याण, डोंबिवली, कल्याण ग्रामीण या सर्व ठिकाणच्या महिला कार्यकर्त्यांनी बुध स्तरावर जाऊन पंतप्रधान नरेंद्र मोदी आणि देवेंद्र फडणीस यांच्या कार्य लोकांना समजून सांगितल पाहिजे, असे आवाहन त्यांनी केले. या वेळी आमदार निरंजन डावखरे, माजी खासदार संजीव नाईक, भाजप शहरअध्यक्ष संदीप लेले आदी उपस्थित होते.