खारघर-तळोज्यात तीज उत्सव उत्‍साहात

खारघर-तळोज्यात तीज उत्सव उत्‍साहात
स्त्रियांचा मोठा सहभाग; बंजारा समाजाचा एकतेचा संदेश
खारघर, ता. १७ (बातमीदार) : बंजारा समाजाच्या संस्कृतीत महत्वाचे स्थान असलेला आणि मांगल्याचे प्रतीक मानला जाणारा तीज उत्सवाचा समारोप खारघर व तळोजा परिसरात शनिवारी मोठ्या उत्साहात झाला. श्रावण महिन्यातील हा पारंपरिक उत्सव विशेषतः तरुणींसाठी आनंदोत्सव मानला जातो. या निमित्ताने समाजातील स्त्रिया व मुली पारंपरिक वेशभूषेत सजून नऊ दिवस देवीची पूजा करून, गाणे-नृत्यातून आपल्या भावना व्यक्त करतात.
तिजोत्सवाची स्थापना रक्षा बंधनच्या दिवशी करण्यात आली होती, तर गोपाळकालाच्या दिवशी ढोल-ताशे, डफ व पारंपरिक गजरात उत्सवाची सांगता झाली. डफलीच्या तालावर महिलांनी नृत्य करीत ईश्वराची आराधना केली. या गाण्यांतून भेटीचा आनंद, विरहाचे दु:ख आणि ईश्वरावरील भक्ती अशा विविध भावना व्यक्त झाल्या. तळोजा येथील उत्सवात माजी आमदार बाळाराम पाटील यांनी सहभाग घेतला. समाजातील तरुण पिढी एकत्र येऊन परंपरा जपण्यासाठी प्रयत्नशील असल्याचे पाहून समाधान वाटते, असे ते म्हणाले. खारघर येथील कार्यक्रमात समाजनायक प्रकाश वडते, किशोर राठोड, कारभारी आर. आर. जाधव यांच्यासह छगन राठोड, रमेश राठोड, कैलास राठोड, संतोष राठोड, सुनील आडे, पंडित जाधव आदी पदाधिकारी उपस्थित होते.
रोहिदास जाधव यांनी सांगितले की, खारघरमध्ये गेल्या २७ वर्षांपासून तिज उत्सव सुरू आहे. समाजातील एकता टिकवून ठेवण्यासाठी परंपरागत सण साजरे केले जातात. भविष्यातील पिढ्यांनीही या परंपरा पुढे नेण्यासाठी मार्गदर्शन केले जाते. या पारंपरिक उत्सवामुळे खारघर आणि तळोजा परिसर बंजारा संस्कृतीच्या रंगात न्हाऊन निघाला. महिलांचा उत्साह, युवकांचा सहभाग आणि समाजातील एकजूट यामुळे यंदाचा तीज उत्सव संस्मरणीय ठरला.