कापूरबावडी मार्ग २३ दिवस बंद

कापूरबावडी मार्ग २३ दिवस बंद
मेट्रोच्या कामासाठी निर्णय; रात्री ते पहाटेपर्यंत वाहनांना बंदी लागू
सकाळ वृत्तसेवा
ठाणे, ( ता. १७) : घोडबंदरवरील कापूरबावडी मार्ग पुढील २३ दिवस रात्री ११ वाजल्यापासून ते पहाटे ५ वाजेपर्यंत वाहतुकीसाठी बंद ठेवण्यात येणार आहे. या परिसरात पडलेले खड्डे आणि मेट्रोच्या कामासाठी हा महत्त्वपूर्ण निर्णय वाहतूक पोलिसांनी घेतला आहे. हा मार्ग सर्व प्रकारच्या वाहतुकीसाठी बंद करून पर्यायी मार्ग सुचवण्यात आले आहेत, मात्र त्यामुळे ठाण्याहून घोडबंदरमार्गे पुढे जाणाऱ्या प्रवाशांना रात्रीच्या प्रवासात कोंडीचा सामना करावा लागण्याची शक्यता आहे.
वाढती वाहने आणि खड्ड्यांमुळे घोडबंदर मार्ग कोंडीत सापडला आहे. दिवसा या मार्गावरून प्रवास करणे जिकिरीचे ठरत असताना आता रात्रीनंतरचा प्रवासही तापदायक ठरण्याची शक्यता आहे. या मार्गावरून रात्री ते पहाटेपर्यंत उरण, गुजरात दिशेने जाणाऱ्या अवजड वाहनांची वर्दळ असते, पण आता मेट्रो चारच्या कामासाठी कापूरबावडी जंक्शनजवळील मार्ग रात्रीच्या सत्रात बंद ठेवण्याचा निर्णय घेण्यात आला आहे. कापूरबावडी जंक्शन भागात सिमेंटचे गर्डर उभारले जाणार आहेत. या कालावधीत क्रेन मुख्य रस्त्यावर उभ्या करण्यात येणार आहेत. त्यासाठी हा मार्ग १७ ऑगस्ट ते १० सप्टेंबरपर्यंत रात्री ११ ते पहाटे ५ वाजेपर्यंत बंद ठेवण्यात येणार असल्याची माहिती वाहतूक पोलिसांनी दिली.

चौकट
या मार्गाचा पर्याय
माजिवडा पुलावरून घोडबंदर दिशेने वाहतूक करणाऱ्या सर्व वाहनांना ज्युपिटर वाय जंक्शन येथे प्रवेशबंदी असणार आहे. येथील वाहने उड्डाणपुलाखालील मार्गाने कापूरबावडी चौक, नंदीबाबा, ढोकाळीमार्गे वाहतूक करतील किंवा पोखरण रोड क्रमांक दोन येथून वाहतूक करण्यास परवानगी असेल.