पाण्याखाली रस्ते

मनोर, ता. १७ (बातमीदार) : पालघर शहरालगतच्या बिडको आणि अल्याळी गाव औद्योगिक वसाहतीमधील अंतर्गत रस्त्यांची खड्ड्यांमुळे चाळण झाली आहे. पावसाच्या पाण्याचा निचरा होत नसल्याने रस्त्यावर पाणी तुंबले आहे. या रस्त्याला तलावाचे स्वरूप आले आहे. खड्ड्यांमधून मालवाहतूक करणारे वाहनचालक आणि दुचाकीस्वारांची तारांबळ उडत असून, पायी प्रवास करणाऱ्या कामगारांची गैरसोय निर्माण होत आहे.

बिडको आणि अल्याळी औद्योगिक वसाहतीमध्ये लहान-मोठे मिळून ३०० पेक्षा अधिक कारखाने आहेत. औद्योगिक वसाहतीमधील रस्त्यांच्या दुरवस्थेमुळे उद्योजक त्रस्त झाले आहेत. औद्योगिक उत्पादन प्रक्रियेदरम्यान राज्याच्या तिजोरीत वस्तू सेवा कर, तसेच ग्रामपंचायतीला मालमत्ता कराच्या माध्यमातून लाखोंचा कर उद्योजकांकडून भरला जातो, मात्र औद्योगिक वसाहतीमधील पायाभूत सुविधा निर्माण केल्या जात नसल्याने उद्योजकांकडून संताप व्यक्त केला जात आहे.

औद्योगिक वसाहतीमध्ये पायाभूत सुविधा निर्माण करण्याची मागणी उद्योजकांच्या मागणीकडे दुर्लक्ष केले जात आहे. माहीम ग्रामपंचायतीतील बिडको औद्योगिक वसाहतीमधील कारखान्यांमध्ये काम करणाऱ्या कामगारांची रस्त्याच्या दुरवस्थेमुळे गैरसोय होत आहे. मालवाहू वाहने आणि दुचाकीस्वारांची गैरसोय होत आहे. खड्ड्यांमुळे मालवाहू वाहने नादुरुस्त होण्याच्या प्रमाणात वाढ झाली आहे. कामगार आणि उद्योजकांची गैरसोय दूर करण्यासाठी औद्योगिक वसाहतीमधील अंतर्गत रस्त्यांची तत्काळ दुरुस्ती करण्याची मागणी केली जात आहे.

गुजरातमध्ये स्थलांतर
औद्योगिक वसाहतीमधील रस्त्यांच्या दुरवस्थेमुळे गैरसोय होत आहे. परिणामी काही उद्योजक माहीममधील उद्योग बंद करून चांगल्या दर्जाच्या पायाभूत सुविधा असलेल्या गुजरातमध्ये स्थलांतर केले जाते. गेल्या काही वर्षांत २५ ते ३० कारखाने गुजरात राज्यात गेल्याची माहिती जयसिंग संखे यांनी दिली. त्यामुळे अनेक कामगारांवर उपासमारीची वेळ आली आहे.

औद्योगिक वसाहतीमधील अंतर्गत रस्त्यांची दुरवस्था झाल्याने उद्योजक आणि कामगारांची गैरसोय होत आहे. कारखान्यांमधून मालवाहतूक करणारे ट्रक नादुरुस्त होत आहेत. पायाभूत सुविधा नसल्याने अनेक उद्योजक गुजरातमध्ये कारखाने हलवत आहेत. ग्रामपंचायत, नगर परिषद, तसेच जिल्हा प्रशासनाने लक्ष घालून बिडको, वेवूर आणि अल्याळी औद्योगिक वसाहतीमध्ये पायाभूत सुविधा निर्माण करून दिल्या पाहिजेत.
- जयसिंग संखे, अध्यक्ष, पालघर तालुका इंडस्ट्रीज फेडरेशन

बिडको औद्योगिक वसाहतीमधील अंतर्गत रस्त्यांच्या दुरुस्तीसाठी करवसुलीनुसार ग्रामपंचायतीच्या अर्थसंकल्पात १८ लाखांची तरतूद करण्याचे ठरले आहे. तसेच एमएमआरडीएकडून वसाहतीमधील प्रत्येकी ३०० मीटरचे तीन रस्ते मंजूर असून, ठेकेदाराला कार्यादेश देण्यात आले आहेत. पावसामुळे रस्त्याचे काम सुरू झाले नाही, परंतु रस्त्यांची दुरुस्ती केली जात आहे.
- प्रीती पाटील, सरपंच, माहीम ग्रामपंचायत