मालमत्ता कर शास्ती माफीसाठी मुदतवाढ देण्याची आमदार प्रशांत ठाकूर यांची मागणी

मालमत्ता करासाठी मुदतवाढ द्यावी
आमदार प्रशांत ठाकूर यांची मागणी
पनवेल, ता. १७ (बातमीदार) ः पालिकेच्या मालमत्ता करावरील शास्ती माफी योजनेला नागरिकांकडून उत्स्फूर्त प्रतिसाद मिळालेला असतानाही, काही नागरिक चुकीच्या माहिती आणि संभ्रमामुळे या योजनेचा लाभ घेण्यास अपयशी ठरले आहेत. त्यामुळे या योजनेची मुदत आणखी ३० दिवसांनी वाढवावी, अशी मागणी आमदार प्रशांत ठाकूर यांनी आयुक्त मंगेश चितळे यांच्याकडे केली आहे. यासंबंधी प्रशांत ठाकूर यांनी आयुक्तांना निवेदन दिले आहे.
प्रशांत ठाकूर म्हणाले, की शास्तीमाफी योजना नागरिकांसाठी दिलासा देणारी ठरली आहे; मात्र काही व्यक्तींनी योजनेविषयी चुकीची माहिती पसरवून संभ्रम निर्माण केला. त्यामुळे अनेक नागरिकांना योग्यवेळी कर भरता आला नाही. ही बाब लक्षात घेऊन योजनेची अंतिम मुदत वाढववी. याचा करदात्यांना दुहेरी लाभ होईल. एकीकडे नागरिकांना आर्थिक दिलासा मिळेल तर दुसरीकडे महापालिकेच्या महसुलातही वाढ होईल, असेही त्यांनी म्हटले आहे.

दोनशे कोटींपेक्षा अधिक महसूल
मालमत्ताधारकांनी मोठ्या प्रमाणावर या योजनेचा लाभ घेतला असून, सुमारे दोनशे कोटींपेक्षा अधिक महसूल महापालिकेला प्राप्त झाला आहे. या मुदतवाढीच्या मागणीमुळे उर्वरित नागरिकांना दिलासा मिळण्याची शक्यता असून महापालिकेच्या महसूलवाढीसही चालना मिळू शकते.