अज्ञात वाहनाच्या धडकेने दोन व्यक्तींचा मृत्यू

अज्ञात वाहनाच्या धडकेने दोन व्यक्तींचा मृत्यू
अपघातानंतर दोन्ही चालकांचे घटनास्थळाहून पलायन
अंधेरी, ता. १७ (बातमीदार) ः भरधाव दोन अज्ञात वाहनाच्या धडकेने दोन व्यक्तींचा मृत्यू झाल्याची घटना वांद्रे परिसरात घडली. याप्रकरणी खेरवाडी पोलिसांनी दोन स्वतंत्र अपघाताची नोंद करून फरार आरोपींचा शोध सुरू केला आहे. मृतांमध्ये अब्दुल लतीफ रेहमान कुरेशी आणि निळकंठ कासू चव्हाण यांचा समावेश आहे. यातील अब्दुल यांच्या बाइकला तर निळकंठ यांना रस्ता क्रॉस करताना अज्ञात वाहनाने धडक दिल्याचे पोलिसांनी सांगितले.
अब्दुल कुरेशी एका मटण शॉपमध्ये कामाला आहे. बुधवारी (ता. १३) सायंकाळी ते त्याच्या दुचाकीवरून जात असताना एमएमआरडीए जंक्शन, बीकेसी कनेक्टर दक्षिण वाहिनीवर येताच त्यांना एका अज्ञात वाहनाने धडक दिली. यामध्ये अब्दुल हे गंभीर जखमी झाले असून त्यांचा उपचारादरम्यान मृत्यू झाला.
निळकंठ चव्हाण मंगळवारी (ता. १२) रात्री कामावरून घरी येत असताना टिचर कॉलनी बसस्थानकासमोरून रस्ता ओलांडत असताना एका अज्ञात वाहनाने त्यांना धडक दिली. त्यात त्यांच्या डोक्याला गंभीर दुखापत झाली होती. उपचारासाठी रुग्णालयात दाखल केले असता निळकंठ यांना मृत घोषित केले होते. दरम्यान, वाहनचालकांनी घटनास्थळावरून पळ काढला.