नवीन तीन पोलिस ठाण्याची निर्मिती

नवीन तीन पोलिस ठाण्यांची निर्मिती
पोलिस आयुक्तालयाअंतर्गत एकूण संख्या २५ वर
नवी मुंबई, ता. १९ (वार्ताहर) : नवी मुंबई पोलिस आयुक्तालयाची नुकतीच झालेली पुनर्रचना आता अंतिम टप्प्यात पोहोचली असून, लवकरच शहरात आणखी तीन नवीन पोलिस ठाणे सुरू होणार आहेत. या नव्या पोलिस ठाण्याच्या नियुक्‍तीनंतर नवी मुंबई आयुक्तालयातील एकूण पोलिस ठाण्यांची संख्या २५ वर जाणार आहे. वाढते नागरीकरण, औद्योगिक विकास आणि आंतरराष्ट्रीय विमानतळ, मेट्रो रेल्‍वे, सागरी सेतू यांसारख्या महत्त्वाकांक्षी प्रकल्पांमुळे निर्माण होणारा कायदा व सुव्यवस्थेचा ताण लक्षात घेऊन हा निर्णय घेण्यात आला आहे.
आयुक्तालयाच्या पुनर्रचनेत बेलापूर परिमंडळ तीन तसेच रबाळे आणि खारघर या दोन सहाय्यक पोलिस आयुक्तांच्या पदांची निर्मिती नुकतीच करण्यात आली आहे. यानंतर पोलिस ठाण्याचे विभाजन करून घणसोली, ऐरोली आणि करंजाडे ही नवी पोलिस ठाणी सुरू करण्याची तयारी सुरू आहे. त्याचबरोबर उरण-मोरा या पोलिस ठाण्याचे पुनर्रचित स्वरूप आणि द्रोणागिरी पोलिस ठाण्याची निर्मितीदेखील प्रस्तावित करण्यात आली आहे. तसेच आंतरराष्ट्रीय विमानतळ कार्यान्वित होण्यापूर्वी विमानतळासाठी स्वतंत्र पोलिस ठाणे सुरू करण्याची हालचाल वेगाने सुरू आहे.
वाढत्या लोकसंख्येमुळे अनेक पोलिस ठाण्यांवर प्रचंड ताण निर्माण झाला आहे. उदाहरणार्थ, रबाळे पोलिस ठाणाच्या हद्दीत ऐरोली व घणसोली परिसर समाविष्ट आहे. या भागाची लोकसंख्या लाखोंमध्ये असल्याने कायदा व सुव्यवस्था राखणे, स्थानिक पोलिसांसाठी आव्हानात्मक ठरत आहे. त्यामुळे रबाळे पोलिस ठाण्याचे विभाजन करून घणसोली आणि ऐरोली अशी स्वतंत्र पोलिस ठाणी कार्यान्वित करण्याचा निर्णय घेण्यात आला आहे. त्याचप्रमाणे पनवेल परिसरात झपाट्याने वाढणाऱ्या करंजाडे नोडसाठी स्वतंत्र पोलिस ठाणे उभारण्यात येणार आहे.
....................
या नव्या पोलिस ठाण्यांसाठी एकूण ३३२ नवीन पोलिस अधिकारी व कर्मचाऱ्यांची गरज भासणार आहे. त्यापैकी ऐरोली आणि करंजाडे या दोन्ही ठिकाणी प्रत्येकी १६६ अधिकारी-कर्मचारी नेमले जाणार आहेत. रबाळे पोलिस ठाण्याचे नाव बदलून घणसोली करण्यात येणार असल्याने त्या ठिकाणी स्वतंत्र मनुष्यबळाची आवश्यकता राहणार नाही. सध्या वाशी परिमंडळ एकमधील सहाय्यक पोलिस आयुक्तांच्या अधिपत्याखाली रबाळे एमआयडीसी, तुर्भे आणि प्रस्तावित घणसोली- ऐरोली पोलिस ठाण्याचा समावेश होईल. बेलापूर परिमंडळ दोनमध्ये सीबीडी, एनआरआय सागरी, नेरूळ, सानपाडा याशिवाय उरण-मोरा, द्रोणागिरी आणि विमानतळ पोलिस ठाणे प्रस्तावित आहेत. पनवेल परिमंडळ तीनअंतर्गत खारघर, कळंबोली, कामोठे, तळोजा याशिवाय करंजाडे पोलिस ठाणी समाविष्ट होणार आहेत.
..................
कोट
नवी मुंबईतील झपाट्याने वाढणारे नागरीकरण आणि विमानतळासारखे प्रकल्प लक्षात घेऊन काही पोलिस ठाण्यांचे विभाजन तसेच नवीन ठाण्यांची निर्मिती करण्याचा प्रस्ताव गृहविभागाकडे पाठवण्यात येत आहे. यामुळे नागरिकांना अधिक प्रभावी सुरक्षा उपलब्ध होईल.
- संजयकुमार पाटील, पोलिस उपायुक्त (मुख्यालय)