नवी मुंबई महापालिकेत परिवर्तन होणार

नवी मुंबई महापालिकेत परिवर्तन होणार
खासदार नरेश म्हस्के यांचा निर्धार
वाशी, ता. १९ (बातमीदार) : नवी मुंबई महापालिका काही मोजक्या नेत्यांची आणि घराणेशाहीची झाली असून, ती लोकाभिमुख करण्याची गरज आहे. या उद्देशाने परिवर्तनाची नांदी या दहीहंडी उत्सवातून केली जात आहे, असे ठाणे जिल्ह्याचे खासदार नरेश म्हस्के यांनी स्पष्ट केले. ऐरोली सेक्टर ८ येथील विबग्योर शाळेसमोरील प्रांगणात शिवसेना (शिंदे गट) नवी मुंबई युवासेना जिल्हाप्रमुख अनिकेत म्हात्रे यांच्या वतीने आयोजित परिवर्तन दहीहंडी उत्सवात ते बोलत होते.
या कार्यक्रमाला राज्याचे उपमुख्यमंत्री एकनाथ शिंदे यांनी विशेष उपस्थिती दर्शवली. त्यांनी आपल्या भाषणात विरोधकांवर टीका करताना गेल्या विधानसभा निवडणुकीत महायुतीने दहीहंडी फोडली आणि माझ्या लाडक्या बहिणींनी फिरवली कांडी, विरोधकांची उडवली दांडी, अशा शब्दांत टोला लगावला. या वेळी येणाऱ्या नवी मुंबई महापालिका निवडणुकीत युवासेना परिवर्तन घडवून आणेल, असा विश्वास त्यांनी व्यक्त केला. दहीहंडी उत्सवाचे आयोजन नेहमीप्रमाणे सेलिब्रिटींच्या उपस्थितीवर न करता गोविंदा हाच माझा सेलिब्रिटी या भावनेवर आधारित होते. त्यामुळे अनिकेत म्हात्रे यांच्या उपक्रमाचे खासदार म्हस्के यांनी विशेष कौतुक केले. त्यांनी आपल्या भाषणात थेट नाव न घेता माजी पालकमंत्री गणेश नाईक यांच्यावर टीका केली. नवी मुंबई पालिकेतील घराणेशाहीच्या पद्धतीतून नागरिकांची सुटका करणे हे परिवर्तनाचे खरे उद्दिष्ट असल्याचे ते म्हणाले. या वेळी व्यासपीठावर नवी मुंबई महापालिकेचे माजी उपमहापौर रमाकांत म्हात्रे, मंदाकिनी म्हात्रे यांच्यासह अनेक मान्यवर उपस्थित होते. परिसरातील नागरिक आणि युवकांनी मोठ्या संख्येने सहभाग घेत परिवर्तन दहीहंडी उत्सवाला उत्स्फूर्त प्रतिसाद दिला.