सतर्क मोटरमनमुळे वाचला प्रवाशाचा जीव

सतर्क मोटरमनमुळे वाचला प्रवाशाचा जीव

मुंबई, ता. १८ : पारसिक मार्गावर रेल्वे रुळाशेजारी झोपलेल्या व्यक्तीचा जीव सतर्क मोटरमनमुळे वाचला. स्वातंत्र्यदिनाच्या सकाळी घडलेल्या या प्रकारामुळे मोठा अपघात टळला. एस. के. खैरनार असे मोटरमनचे नाव असून, त्यांच्या या कार्याचे सर्वत्र कौतुक होत आहे.
सानपाडा येथून दिव्याकडे रिकामा रेक घेऊन जात असलेले मोटरमन एस. के. खैरनार यांनी पारसिक मार्गावर रुळांजवळ झोपलेला व्यक्ती पाहिला. त्यांनी तातडीने आपत्कालीन ब्रेक लावला आणि गाडी त्या व्यक्तीपासून काही मीटर अंतरावरच थांबवली. त्यानंतर त्यांनी त्या व्यक्तीस रुळांपासून दूर जाण्यास सांगितले व गाडी पुढे निघाली. ही गाडी प्रवाशांविना असल्याने अनर्थ टळला. रेल्वे ट्रॅकवर अनधिकृत प्रवेश किंवा रुळांजवळ जाणे हा प्रकार जीवघेणा आहे. अशा घटनांमुळे मोटरमन आणि रेल्वे कर्मचाऱ्यांना मानसिक ताण सहन करावा लागतो. परिणामी लोकल सेवा विस्कळित होते व प्रवाशांना विलंबाचा त्रास सहन करावा लागतो.