मुंबईच्या पावसाचा डब्बेवाल्यांना फटका

मुंबईच्या पावसाचा डबेवाल्यांना फटका
सकाळ वृत्तसेवा
मुंबई, ता. १८ : मुंबईत सोमवारी कोसळलेल्या मुसळधार पावसाचा फटका डबेवाल्यांना बसला. जोरदार पावसामुळे मध्य तसेच हार्बर रेल्वे रुळावर काही ठिकाणी पाणी साचल्यामुळे काही काळ रेल्वे सेवा ठप्प झाली होती.
रस्ते वाहतूकही ठप्प झाली होती. मुंबईच्या बहुतांश भागात तसेच उपनगरात डब्यांची सेवा पोहोचवण्यास उशीर झाला. त्यामुळे कार्यालयात पोहोचलेल्या अनेकांना जेवण्यास अर्धा तास उशीर झाला.
मध्य व हार्बर लाइनवरील कार्यालयांमध्ये डबे देण्यास अधिक उशीर झाल्‍याचे डबेवाल्‍यांनी सांगितले.
वाशी, सानपाडा, तुर्भे, कल्याण, डोबिंवली, घाटकोपर, चेंंबूर या भागातून घरातून डबे घेतले, मात्र रेल्‍वेस्‍थानकावर पोहोचल्‍यानंतर लोकलमधील गर्दी वाढल्यामुळे लोकलमध्ये चढायला मिळाले नाही. त्यानंतरच्या गाडीने जावे लागले. काही या मार्गावरील लोकल सेवा काही काळासाठी ठप्प झाल्यामुळे डबे पोहोचवण्यास उशीर झाला, असे डबेवाल्‍यांनी सांगितले.

दिलगिरी व्यक्‍त
पावसामुळे आज मुंबईच्या बहुतांश भागात तसेच उपनगरांत डब्यांची सेवा पोहोचवण्यास ३० मिनिटे उशीर झाला. ग्राहकांना होणाऱ्या गैरसोयीबद्दल आम्ही दिलगीर आहोत, अशी प्रतिक्रिया मुंबई डबेवाले संघटनेचे अध्यक्ष उल्हास मुके यांनी दिली.