ठाणे रेल्वेस्थानकात प्रवाशांचा खोळंबा

ठाणे, ता. १९ : दोन दिवसांपासून सुरू असलेल्या पावसाचा फटका मध्य रेल्वेलाही बसला. सकाळी नोकरी-धंद्यावर निघालेल्या चाकरमान्यांचा ठाणे स्थानकात खोळंबा झाल्याचे चित्र पाहायला मिळाले.
कर्जत, बदलापूरहून मुंबई दिशेला जाणाऱ्या प्रवाशांचा प्रवास सकाळी ठाणे स्थानकापर्यंतच झाला. ठाण्याहून मुंबई दिशेला जाणारी वाहतूक बंद झाल्याने चाकरमान्यांना परतीचा प्रवास करण्यासाठी कसरत करावी लागली. ठाण्याहून कल्याण दिशेला जाणारी वाहतूक दुपारपर्यंत सुरळीत ठेवण्यात यश आले होते. त्यामुळे ठाणे स्थानकात प्रवाशांची प्रचंड गर्दी झाल्याचे दिसून आले. प्रवाशांना योग्य माहिती देण्यासाठी रेल्वे पोलिस आणि सुरक्षा बलाचे अधिकारी भोंग्यावरून सूचना देत होते. दरम्यान, ठाणे रेल्वेस्थानकाच्या परिसरातही पाणी साचले होते. रिक्षा स्टँडवर एकही वाहन नसल्याने नागरिकांनी सॅटीसवर बस पकडण्यासाठी गर्दी केली होती; मात्र टीएमटीच्या बसही उशीराने धावत असल्यामुळे ठाणेकरांचे हाल झाले.

रेल्वे रुळावरून पायपीट
लोकल ठिकठिकाणी खोळंबल्यामुळे ठाणे स्थानकात अनेक प्रवासी रेल्वे रुळावरून पायपीट करत असल्याचे दृश्य दिसत होते.

कळवा स्थानकात पाणीच पाणी
पहाटेपासून कोसळणाऱ्या पाऊसधारांमुळे कळवा स्थानकावरील रेल्वे रुळ पाण्याखाली गेले होते. कळवा परिसरातील रेल्वे कारशेडवरून सुटणाऱ्या लोकल पकडण्यासाठी जीव धोक्यात घालून रेल्वे रुळावर प्रवाशांची गर्दी केली होती.