अतिवृष्टीमुळे उरण मधील घरांची पडझड

उरणमध्ये कौलारू घरांची पडझड
न्हावा-शेवा पोलिस ठाण्यात पावसाचे पाणी
उरण, ता.१९ (वार्ताहर)ः तीन दिवसांपासून कोसळणाऱ्या पावसाचा तडाखा उरण तालुक्याला बसला आहे. अनेक ठिकाणी घरांची पडझड झाली असून रस्ते पाण्याखाली गेल्याने वाहनचालक बेजार झाले आहेत. तर न्हावा-शेवा पोलिस ठाण्याच्या इमारतीत पावसाचे पाणी शिरल्याने पोलिसांनाही विविध अडचणींचा सामना करावा लागला.
उरण तालुक्यातील रानसई, मोठी जुई, पिरकोन, चाणजे, जासई, सारडे, कोप्रोली, चिरनेर भागातील कौलारू घर पडल्याची नोंद आहे. या दुर्घटनेत जीवीतहानी झाली नसली तरी आर्थिक नुकसान झाले आहे. याचबरोबर उरण जेएनपीए बंदराला जोडणारे नवी मुंबई, पनवेल शहराकडील रस्ते पाण्याखाली गेल्याने अनेक ठिकाणी कोंडी झाली होती. त्याचबरोबर जेएनपीए बंदर तसेच परिसराच्या सुरक्षेसाठी असलेल्या न्हावा-शेवा पोलिस ठाण्याच्या इमारतीत पावसाचे पाणी शिरल्याने कर्मचाऱ्यांना अडचणींचा सामना करावा लागत आहे.