वकीलांच्या दोन गटांत हाणामारी; गुन्हे दाखल

वकिलांच्या दोन गटांत हाणामारी; गुन्हे दाखल
भिवंडी, ता. १९ (वार्ताहर) : भिवंडी न्यायालयातील पार्किंगच्या वादातून दोन वकिलांच्या गटात न्यायालयाच्या आवारातच शिवीगाळ व धक्काबुक्कीनंतर हाणामारीची घटना मंगळवारी (ता. १८) घडली. याप्रकरणी परस्परविरोधी दिलेल्या तक्रारींवरून शांतिनगर पोलिस ठाण्यात गुन्हे दाखल करण्यात आले आहेत.
भिवंडी न्यायालयाच्या आवारात वाहन उभे करण्यासाठी राखीव असलेल्या ठिकाणी ॲड. संजय श्रीवास्तव हे आपली कार उभी करीत होते. त्यास बार असोसिएशनचे अध्यक्ष ॲड. किरण चन्ने यांनी हरकत घेतली होती. त्या वेळी न्यायालयाच्या आवारात दोघांनी शिवीगाळ करीत एकमेकांना धक्काबुक्की केली. काही वेळाने श्रीवास्तव हे अशोकनगर येथील आपल्या कार्यालयात गेले असताना किरण चन्ने यांनी मोबाईल कॉल करून शिवीगाळ केल्याप्रकरणी जाब विचारला. त्यानंतर चन्ने वकील सहकाऱ्यांसोबत अशोकनगरमार्गे जात असताना तेथे श्रीवास्तव व त्याचे साथीदार उभे होते. या ठिकाणी दोन्ही गटांत पुन्हा वाद झाला. यामध्ये संजय श्रीवास्तव व त्याचा भावासह पाच ते सहा जण आणि किरण चन्ने यांच्यासह पाच जणांमध्ये हाणामारी झाली. त्या वेळी तलवारीसारख्या शस्त्राने हल्ला झाला असता किरण चन्ने यांनी स्वसंरक्षणासाठी आपले परवानाधारक पिस्टल काढून रोखले. पण अंगरक्षकाने प्रसंगावधान राखत किरण चन्ने यांचा बचाव केला. याप्रकरणी संजय श्रीवास्तव यांनी दिलेल्या तक्रारीवरून किरण चन्ने यासह शाहिद, शंकर दरेकर, अंकुश जाधव ऊर्फ बंटी व इतर दोन इसमांविरोधात गुन्हा दाखल करण्यात आला. रात्री उशिरा किरण चन्ने यांनी दिलेल्या तक्रारीवरून संजय श्रीवास्तव यांच्यासह इतरांविरोधात ॲट्रॉसिटीसह विविध कलमांन्वये गुन्हा दाखल करण्यात आला आहे.