नाल्यात उडी टाकणाऱया तरुणाचा मृतदेह अखेर सापडला

नाल्यात उडी मारणाऱ्या तरुणाचा मृतदेह सापडला
नवी मुंबई, ता. २२ (वार्ताहर) : वाशी सेक्टर-२८ येथील नाल्यात उडी मारलेल्या निकुंज धीरज भानुशाली (वय ३४) या तरुणाचा मृतदेह गुरुवारी (ता. २१) वाशी खाडी परिसरात सापडला आहे. दारूच्या व्यसनामुळे त्याने हे टोकाचे पाऊल उचलल्याचे उघड झाले आहे.
निकुंज सोमवारी (ता. १८) मुसळधार पावसात घरातून निघून गेला होता. त्याचे वडील त्याला शोधत असताना तो त्यांना वाशी सेक्टर-२८ येथील बसस्टॉपजवळ दिसला; मात्र वडिलांना पाहून त्याने पळ काढला आणि नाल्यावरील पाइपलाइनवर चढून नाल्यात उडी मारली. पाण्याच्या जोरदार प्रवाहामुळे तो वाहून गेला.
अग्निशमन दल आणि मच्छीमारांनी त्याचा शोध घेतला, पण तो सापडला नाही. अखेर गुरुवारी सकाळी त्याचा मृतदेह खाडीत तरंगताना आढळला. पोलिसांनी मृतदेह बाहेर काढून ओळख पटवली. याप्रकरणी अपमृत्यूची नोंद करण्यात आली आहे.