सहा फुटांखालील मूर्तींसाठी खदानींची पाहणी

सहा फुटांखालील मूर्तींसाठी खदानींची पाहणी
भाविकांसाठी नव्या विसर्जन व्यवस्थेची आखणी
डोंबिवली, ता. २३ : उच्च न्यायालयाच्या आदेशानुसार सहा फुटांपर्यंतच्या गणेशमूर्तींचे नैसर्गिक जलस्रोतांमध्ये विसर्जन करण्यास बंदी घातली आहे. या पार्श्वभूमीवर कल्याण डोंबिवली महापालिका प्रशासनाने भाविकांसाठी वैकल्पिक विसर्जन व्यवस्था तयार करण्याचे नियोजन सुरू केले आहे. महापालिकेच्या हद्दीत सध्या सुमारे ६८ विसर्जन घाट आहेत; मात्र यंदा खाडीकिनारी विसर्जनास बंदी असल्याने आणि काही तलावांचे सुशोभीकरण सुरू असल्यामुळे मूर्ती विसर्जनासाठी पर्याय म्हणून खदानींचा विचार केला जात आहे. यासाठी प्रशासनाने पाच ते सहा खदानींची पाहणी सुरू केली असून, त्यावर लवकरच निर्णय घेतला जाणार आहे.

म्हारळ गावाजवळील तीन, डोंबिवली ग्रामीणमधील उंबार्ली गावातील एक, निळजे परिसरातील दोन खदानींच्या पाण्याची खोली, आसपासच्या सोयी, सुरक्षेची व्यवस्था आणि वाहतुकीची उपलब्धता यांचा आढावा घेतला जात आहे. या जागांवर विसर्जनासाठी कृत्रिम तलावासारख्या सोयीसुविधा निर्माण करण्याचा विचार आहे. महापालिकेच्या अधिकाऱ्यांनी स्पष्ट केले, की खदानींच्या पाहणीचे काम अंतिम टप्प्यात आहे. योग्य त्या सुरक्षात्मक आणि पर्यावरणीय उपाययोजना करून काही खदानींचा विसर्जनासाठी वापर केला जाऊ शकतो.

गणेशोत्सवासाठी महापालिकेचे नियोजन
कल्याण-डोंबिवलीमध्ये घरगुती आणि सार्वजनिक असे सुमारे ४० हजारांपेक्षा अधिक गणपती विराजमान होतात. यात सुमारे ४० हजार घरगुती गणपती, तर ३०० सार्वजनिक गणपती आहेत.
विसर्जनाच्या वेळी नागरिकांना त्रास होऊ नये म्हणून महापालिकेने ५८ ठिकाणी कृत्रिम विसर्जन टाक्या, ५२ नैसर्गिक जलस्रोत, ११ ठिकाणी ‘विसर्जन आपल्या दारी’ उपक्रम, मोठ्या प्रमाणात कृत्रिम तलावांची निर्मिती अशा उपाययोजना हाती घेतल्या आहेत. तसेच सीसीटीव्ही कॅमेरे, वाहतूक नियोजन आणि पोलिस बंदोबस्त ठेवण्यात येणार आहे.