राज्यातील शिक्षकांना मिळणार गणेश चतुर्थीआधी वेतन

राज्यातील शिक्षकांना मिळणार गणेश चतुर्थीआधी वेतन
जुईनगर, ता. २४ (बातमीदार) : राज्यात सर्वत्र बुधवार (ता. २७) श्रीगणेशाचे आगमन होत आहे. गणेशोत्सव महाराष्ट्रातील मोठा सण असून, उत्साहाने, आनंदाने साजरा केला जातो. कोकणातील चाकरमानी तर दोन दिवस आधीच गावाकडे धाव घेतात. गणपती सणानिमित्त शाळा व महाविद्यालयांना पाच दिवसांची सुट्टी आहे. राज्यातील प्रमुख आणि मोठा सण असल्यामुळे शिक्षकांना गणपती आगमनापूर्वी पगार मिळावेत, अशा मागण्या शिक्षक संघटनांनी केल्या होत्या.
याविषयी गुरुवारी (ता.२१) शासन उपसचिव डॉ. राजेंद्रा गाडेकर यांनी शासनातील सर्वच घटकांना गणेशोत्सव साजरा करताना आर्थिक अडचणींचा सामना करावा लागू नये म्हणून मंगळवारी (ता. २६) वेतन प्रदान करण्याचे आदेश दिले आहेत. त्यात मान्यता प्राप्त व अनुदानित शैक्षणिक संस्थांचा उल्लेख केला असल्याने शिक्षकांनी समाधान व्यक्त केले आहे.
तसेच दि. १ जानेवारी २०२५ ते ३१ जुलै २०२५ या कालावधीतील महागाई भत्त्याची थकीत रक्कम, ऑगस्ट २०२५च्या वेतन देण्याबाबत शासनाने यापूर्वीच मंजुरी दिलेली आहे. त्यामुळे शासनाने तातडीने निधीची उपलब्धता करून ती रक्कमदेखील या वेतनासोबत द्यावी, अशी मागणी करण्यात आली होती.
याबाबत शिक्षक भारती संघटनेचे कार्याध्यक्ष सुभाष मोरे यांनी उपमुख्यमंत्री तथा वित्तमंत्री अजित पवार आणि शिक्षणमंत्री दादा भुसे यांना शिक्षक, शिक्षकेतर कर्मचाऱ्यांचे ऑगस्ट पेड इन सप्टेंबर महिन्याचे वेतन गणपती सणापूर्वी करण्याची मागणी केली होती. या शासनाच्या आदॆशाने नक्कीच आनंद झाला आहे.