उरणात पोलीसांचे दंगा काबू अभियान

उरण येथे पोलिसांचे दंगा काबू अभियान
उरण, ता. २३ (वार्ताहर) ः गणेशोत्सव व ईद-ए- मिलादच्या पार्श्वभूमीवर नवी मुंबई आयुक्तालय क्षेत्रामधील सुरक्षा व्यवस्था कडक करण्यात आली आहे. उरण, न्हावा शेवा, मोरा सागरी पोलिसांनी ‘दंगा काबू’ अभियान राबविण्यास उरणात सुरुवात केली आहे. याचाच भाग म्हणून शुक्रवार व शनिवार या दोन दिवसांमध्ये मॉकड्रिल व दंगा काबूच्या माध्यमातून सुरक्षा व्यवस्थेचा आढावा घेण्यात आला.
उरण परिसरामध्ये गणेशोत्सव व ईद-ए-मिलाद शांततेमध्ये साजरा व्हावा, यासाठी विशेष खबरदारी घेण्यात आली आहे. नवीमुंबई पोलिस आयुक्त यांच्या मार्गदर्शनाखाली शुक्रवारी (ता. २२) उरण शहरात मॉकड्रिल घेण्यात आले. शनिवारी (ता. २३) दंगा काबू योजनेची उरण, न्हावाशेवा व मोरा सागरी पोलिस ठाण्याच्या संयुक्त विद्यमानाने उरण एसटी स्थानक, चारफाटा, उरण या ठिकाणी रंगीत तालीम अभियान घेण्यात आली. यामध्ये उरण पोलिस ठाण्यातील चार सपोनि / पोउपनि, ३० पोलीस अंमलदार, न्हावाशेवा पोलिस ठाणेचे एक पोउपनि, १३ पोलिस अंमलदार
आणि मोरा पोलिस ठाणे येथील १ पोउपनिरी, १० पोलिस अंमलदार यांच्यासह द्रोणागिरी सिडको अग्निशामक विभागाकडील अग्निशामक वाहन त्यावर एक अधिकारी आणि पाच कर्मचारी व इंदिरा गांधी हॉस्पिटल येथील एक रुग्णवाहिका व दोन कर्मचारी उपस्थित होते. ही दंगा काबू योजना शांततेत पार पडल्याची माहिती उरण पोलिस ठाण्याचे वरिष्ठ पोलिस निरीक्षक हनीफ मुलाणी यांनी दिली.