शिरगाव-चिखले रस्ता खड्डेमुक्त करा

शिरगाव-चिखले रस्ता खड्डेमुक्त करा
मुरबाड, ता. २३ (बातमीदार) : तालुक्यातील शिरगाव-चिखले रस्त्याची अत्यंत दुरवस्था झाली असून, वारंवार खड्डे बुजवले गेले तरी पुन्हा नव्याने खड्डे निर्माण होत असल्यामुळे वाहनचालक त्रस्त झाले आहेत. या रस्त्यावरून दररोज मोठ्या प्रमाणात वाहने, विशेषतः जड वाहने (डम्पर) धावत असल्यामुळे रस्ता लवकरच उखडतो. त्यामुळे या रस्त्याचे सिमेंट काँक्रीटच्या माध्यमातून कायमस्वरूपी पुनर्बांधणी करावी, अशी मागणी मुरबाड तालुका काँग्रेस अध्यक्ष चेतनसिंह पवार यांनी केली आहे.

चेतनसिंह पवार आणि परिसरातील नागरिकांनी शिरगाव ते मुरबाड अशी शुक्रवारी (ता. १) पदयात्रा काढून रस्त्याच्या स्थितीविरोधात आवाज उठवला होता. त्यानंतर मंगळवारी (ता. १२) मुरबाडचे तहसीलदार अभिजित देशमुख यांच्या अध्यक्षतेखाली तहसील कार्यालयात रस्त्याबाबत बैठक झाली. बैठकीत जिल्हा परिषद व सार्वजनिक बांधकाम विभागाचे उपअभियंता संजय कोरडे यांनी तात्पुरत्या स्वरूपात खड्डे बुजवण्याचे आश्वासन दिले.

मुरबाड ते चिखले रस्ता साडेपाच मीटर रुंदीचा सिमेंट काँक्रीट रस्ता त्वरित तयार करावा. चिखलेजवळील काळू नदीवरील पुलाची उंची अत्यंत कमी आहे. पावसाळ्यात पाणी साचून वाहतूक ठप्प होते. त्यामुळे नवीन आणि उंच पूल बांधण्याची तातडीची गरज आहे; अशी मागणी केली आहे.