भिवंडीत खड्ड्यामुळे डॉक्टरचा बळी

भिवंडीत खड्ड्यामुळे डॉक्टरचा बळी

ट्रकखाली चिरडून मृत्यू; ट्रकचालकाविरुद्ध गुन्हा

भिवंडी, ता. २३ (वार्ताहर) : वंजारपट्टी नाका परिसरात शुक्रवारी (ता. २२) मध्यरात्रीच्या सुमारास खड्ड्यामुळे डाॅक्टरचा बळी गेला. डाॅ. माेहम्मद नसीम अमीनुद्दीन अन्सारी (वय ५८) असे मृताचे नाव आहे. ढाब्यावर जेवण करून घरी जात असताना खड्ड्यांमुळे ताेल जाऊन अन्सारी दुचाकीवरून खाली पडले. त्याच वेळी बाजूने जाणाऱ्या ट्रकच्या मागच्या चाकाखाली चिरडून त्यांचा मृत्यू झाला.

डॉ. नसीम अन्सारी हे रात्री ढाब्यावर जेवण करून मध्यरात्री १२.२०च्या सुमारास दुचाकीवरून घरी जात हाेते. सिराज रुग्णालयासमोरच्या रस्त्यावर काँक्रीट रस्ता आणि डांबरी रस्ता यामध्ये पडलेल्या भेगेमुळे खड्डा तयार झाला आहे. या खड्ड्याचा अंदाज न आल्यामुळे अन्सारी हे दुचाकीवरून रस्त्यावर पडले. त्याच वेळी बाजून जाणाऱ्या ट्रकच्या मागच्या चाकाखाली सापडून त्यांचा जागीच मृत्यू झाला.
या घटनेनंतर संतप्त झालेल्या स्थानिकांनी काही वेळ रस्ता रोखून धरला हाेता. त्यामुळे तणावाची परिस्थिती निर्माण झाली हाेती. अखेर सहाय्यक पाेलिस आयुक्त सचिन सांगळे, निजामपूर पाेलिस ठाण्याचे वरिष्ठ पाेलिस निरीक्षक विश्वास डागळे हे फाैजफाट्यासह घटनास्थळी दाखल झाले. त्यांनी संतप्त जमावाला शांत करून परिस्थिती नियंत्रणात आणली. त्यानंतर निजामपूर पाेलिस ठाण्यात ट्रकचालक मोहम्मद बिलाल मोहम्मद अस्लम याच्याविरोधात गुन्हा दाखल करून त्याला ताब्यात घेतले आहे.
---
खडी टाकून बुजवला रस्ता
शहरातील अनेक रस्त्यांवर खड्डे आहेत. त्याचसोबत काँक्रीट आणि डांबरी वा पेव्हरब्लॉक रस्त्यांमधील गॅप अपघाताला कारणीभूत ठरत आहे. त्याकडे पालिकेचे दुर्लक्ष होत आहे. शहरातील अवजड वाहनांची वाहतूक पोलिसांनी तत्काळ थांबवावी, अशी मागणी नागरिक करीत आहेत. दरम्यान, शुक्रवारी सकाळी स्थानिक नागरिकांनी या खड्ड्यांत खडी टाकून खड्डा तात्पुरता बुजवला आहे.
----
पालिका अधिकाऱ्यांविरुद्ध
गुन्हा दाखल करा!
खड्ड्यामुळे झालेल्या या अपघातानंतर आमदार रईस शेख यांनी पोलिस उपायुक्त शशिकांत बोराटे यांची शिष्टमंडळासह भेट घेतली. हा अपघात खड्ड्यामुळे झाला असून त्यास महापालिका प्रशासन जबाबदार आहे. त्यामुळे संबंधित अधिकाऱ्यांविरोधात सदोष मनुष्यवधाचा गुन्हा दाखल करण्याची मागणी त्यांनी केली. यावर पोलिस उपायुक्तांनी तक्रारदारांचा पुरवणी जबाब घेऊन गुन्हा दाखल करण्याचे आश्वासन दिल्याची माहिती आमदार शेख यांनी दिली आहे. याबाबत पालिका उपायुक्त विक्रम दराडे यांच्याकडून प्रतिक्रिया जाणून घेण्याचा प्रयत्न केला असता त्यांनी यावर बोलण्यास नकार दिला.