भिवंडीत वेगवेगळ्या अपघातात दोघांचा मृत्यू

भिवंडीत वेगवेगळ्या अपघातांत दोघांचा मृत्यू
भिवंडी, ता. २३ (वार्ताहर) : भिवंडी शहरात एका दुचाकीस्वार डॉक्टरच्या मृत्यूनंतर लगेचच, भिवंडी तालुक्यात झालेल्या दोन वेगवेगळ्या अपघातांमध्ये दोघांचा दुर्दैवी मृत्यू झाला आहे. याप्रकरणी नारपोली पोलिस ठाण्यात गुन्हा दाखल करण्यात आला आहे. यातील एका अपघाती मृत्यूप्रकरणी तब्बल १२ वर्षांनंतर गुन्हा दाखल करण्यात आला आहे.
पहिल्या घटनेत, विश्वनाथ एकनाथ ठोके (रा. डोंबिवली पूर्व) गुरुवारी (ता. २१) रात्री साडेदहाच्या सुमारास हे त्यांच्या दुचाकीवरून जात असताना एका हुंदाई कारने त्यांना जोरदार धडक दिली. या अपघातात त्यांचा जागीच मृत्यू झाला. याप्रकरणी हुंदाई कारचालकावर गुन्हा दाखल करण्यात आला आहे.
दुसऱ्या प्रकरणात, १९ मे २०१३ रोजी मुंबई-नाशिक महामार्गावरील भिवंडी बायपासवर एका अज्ञात वाहनाने एका व्यक्तीला धडक दिली होती. त्या अपघातात गंभीर जखमी झालेल्या त्या अज्ञात व्यक्तीचा उपचारादरम्यान सिव्हिल रुग्णालयात मृत्यू झाला होता. या घटनेनंतर तब्बल १२ वर्षांनी चौकशी पूर्ण होऊन शुक्रवारी (ता. २२) अज्ञात वाहनचालकाविरोधात गुन्हा दाखल करण्यात आला आहे.