चारोटी टोल नाक्यावर गुटखा जप्त

कासा (बातमीदार) : मुंबई-अहमदाबाद महामार्गावरील चारोटी घोळ टोलनाका येथे शुक्रवारी (ता. २२) सकाळी कासा पोलिस आणि पालघर स्थानिक गुन्हे शाखेने संयुक्त कारवाई करत नऊ लाख ६९ हजारांचा तंबाखूजन्य गुटखा जप्त केला. याप्रकरणी कारचा चालक मुकेश लालचंद कश्यप (वय २६, रा. मानखुर्द, मुंबई) याला अटक करण्यात आली आहे. गुजरातहून मुंबईकडे गुटखा वाहतूक होत असल्याची माहिती सामाजिक कार्यकर्ते सुदाम कदम यांना मिळाली होती. त्यांनी तत्काळ पोलिसांना कळवल्यानंतर चारोटी टोलनाक्यावर (जीजे १५ बीबी ३९६९) या संशयित कारला अडवण्यात आले. तपासणीदरम्यान वाहनातून १५ मोठ्या गोण्या आढळून आल्या. त्यामध्ये बंदी घालण्यात आलेल्या ब्रँडच्या तंबाखूजन्य गुटख्याचा साठा मिळून आला. गाडी आणि मुद्देमालाची एकत्रित किंमत जवळपास १९ लाख ७० हजार रुपये आहे.