मुंब्र्यात घराची भिंत पडली

मुंब्र्यात घराची भिंत कोसळली
कळवा, ता. २३ (बातमीदार) : मुंब्रा येथील संजयनगरमध्ये असलेल्या दर्गा चाळीतील दोन जुन्या घरांची सामायिक भिंत शनिवारी (ता. २३) सायंकाळी पावणेपाचच्या सुमारास कोसळली. या घटनेत कोणीही जखमी झाले नाही. कारण दोन्ही घरांचे रहिवासी त्या वेळी बाहेर गेले होते.
गेली ३५ ते ४० वर्षे जुन्या असलेल्या सुदाम विलास शिंदे आणि मुजामिल शेख यांच्या घरांच्या मध्ये ही भिंत होती. भिंत पडल्यानंतर उर्वरित घरेही धोकादायक बनली आहेत. तातडीने मुंब्रा बांधकाम विभाग, अतिक्रमण नियंत्रण विभाग, आपत्ती व्यवस्थापन कक्ष आणि अग्निशमन दलाचे अधिकारी घटनास्थळी दाखल झाले.
सुरक्षिततेच्या दृष्टीने दोन्ही घरे रिकामी करण्यात आली असून, रहिवाशांना त्यांच्या नातेवाइकांकडे हलवण्यात आले आहे. घटनास्थळी धोकापट्टी आणि बॅरिकेड्स लावण्यात आले असून, पुढील कार्यवाही मुंब्रा प्रभाग समितीकडून करण्यात येणार आहे.