खारघरमध्ये मंडपांकडून सामाजिक, ऐतिहासिक संदेश

खारघरमध्ये मंडपांकडून सामाजिक, ऐतिहासिक संदेश
विठ्ठलाची दिंडी, जेजुरी गड पाहण्यासाठी नागरिकांची गर्दी
खारघर, ता. २८ (बातमीदार) : खारघरमध्ये गणेशोत्सवानिमित्त सार्वजनिक गणेश मंडळांकडून धार्मिक, सामाजिक, ऐतिहासिक आणि प्रबोधनात्मक संदेश देणारी विशेष देखावे तयार करण्यात आली आहेत. या वर्षी काही मंडळांनी प्रथमच मूर्तीचे चरण सोने आणि चांदीचे ठेवण्याचा विशेष प्रयोग केला असून, मंडपातील देखावे प्रेक्षकांना आकर्षक करत आहेत.
खारघरमध्ये गणेशोत्सवात सुमारे दहा मोठ्या सार्वजनिक मंडळांकडून श्री गणेशाची प्रतिष्ठापना करण्यात आली आहे. या मंडळांमध्ये खारघर सेक्टर २१ रहिवासी विकास मंडळाने या वर्षी जेजुरी येथील खंडोबाची मूर्ती श्री गणेशाच्या रूपात साकारली आहे. मंडपात प्रवेश करताच येळकोट येळकोट जय मल्हारच्या गजराचा आनंद प्रेक्षकांना अनुभवायला मिळत आहे. मंडपाच्या आतील भागात चारही बाजूंनी जेजुरी गडाची प्रतिकृती देखील साकारली गेली आहे. तर खारघरचा राजा श्री गणेश मंडळाने गणेश, श्रीराम आणि हनुमानाची शौर्य गाथा दर्शवणारे तसेच देशाचा पोशींदा असलेल्या शेतकऱ्यांची बैलगाडी शेतात काम करताना दाखविले आहे. सेक्टर १९, स्वामी समर्थ कृपा मित्र मंडळ, खारघर यांनी डोंगर आणि पांडवकडा धबधब्याचे देखावे साकारले आहेत. तर सिडको बागेश्री सहकारी गृहनिर्माण सोसायटी, बागेश्री व्यवस्थापन समितीने श्री विठ्ठलाच्या दिंडी सोहळ्याचे मनोहारी दृश्य प्रेक्षकांसमोर आणले आहे.
.................
मूर्तीचे अलंकरण
खारघर सेक्टर २०, शिल्प चौक येथे श्री गणेश मंडळाने दोन लाख रुपयांचा खर्च करून मूर्तीचे चरण चांदीचे केले आहेत. शिवसेना नवनिर्माण सेवाभावी संस्थेच्या गणेश मंडळाने जवळपास बारा लाख रुपयांचा खर्च करून मूर्तीचे चरण सोन्याचे साकारले असून चांदीचे अलंकार तयार केले आहेत.
........................
सामाजिक संदेश:
यावर्षी गणेश मंडपात हाती धनुष्यबाण घेऊन श्रीराम आणि हनुमानाचे चलचित्र तसेच जमू-काश्मीरमधील पहेलगाम हल्ला आणि भारताने राबविलेल्या सिंदूर मोहिमेत सैन्यातील दोन कर्तबारी महिलांची कामगिरी दर्शवणारे देखावे साकारले आहेत. या माध्यमातून युवा पिढीला देशभक्ती, साहस आणि सामाजिक जबाबदारीची प्रेरणा दिली जात आहे.

उपसंहार:
गणेशोत्सवात प्रेक्षक फक्त धार्मिक अनुभव घेणार नाहीत, तर ऐतिहासिक, सामाजिक आणि प्रबोधनात्मक संदेशही जाणून घेतील. खारघरमधील सार्वजनिक गणेश मंडळांनी यंदाच्या उत्सवाला नवचैतन्य दिले असून, समाजाला सांस्कृतिक तसेच शैक्षणिक संदेश पोहोचविण्यासाठी हे उपक्रम महत्त्वाचे ठरतील.