मिठाई, फुले आणि फळांचा बाजार कोटींच्या घरात

मिठाई, फुले, फळांचा बाजार कोटींच्या घरात
गणेशोत्सव काळात मागणीमुळे व्यापार वाढणार

सकाळ वृत्तसेवा
नवी मुंबई, ता. २४ : गणेशोत्सवामुळे खरेदी करण्यासाठी बाजारापेठा ग्राहकांनी फुलल्या आहेत. या काळात लाडक्या बाप्पांसाठी फुले, मिठाई आणि फळांच्या मागणीतही मोठी वाढ होते. त्यामुळे या वस्तूंचा व्यापार यंदा कोटींच्या पुढे जाणार आहे. मिठाई आणि फळांचा बाजार सरासरी १०० कोटींच्या घरात जाईल, तर फुलांचा व्यवसायही ५० कोटींच्या आसपास होईल, असा अंदाज दादर आणि वाशीतील व्यापाऱ्यांकडून वर्तवण्यात येत आहे.

२७ ऑगस्टपासून गणेशोत्सवाला सुरुवात होत आहे. सध्या फळ बाजारात मोठ्या प्रमाणात केळी, चिकू, पेर, सफरचंद या फळांना मागणी वाढते आहे. सध्या या फळांचा हंगाम सुरू आहे, परंतु त्यासोबतीने मोसंबी आणि संत्री या फळांचेही भाव वधारत आहेत. देवाजवळ वाहण्यासाठी फळांचाही वापर होत असल्याने उत्सवकाळात फळांची मागणी वाढते. त्यामुळे गणेशोत्सवकाळात फळांचा बाजार सुमारे शंभर कोटींच्या घरात जाईल, असा अंदाज फळ व्यापारी संजय पानसरे यांनी वर्तविला. गणरायाला भक्तांकडून मोदकांचा नैवेद्य दिला जातो. त्यातच काजू आणि खव्यापासून तयार केलेल्या मोदक मिठाईसा भाविक जास्त पसंती देतात. गणेशोत्सवकाळात मिठाईचा बाजारातील व्यवहार सुमारे शंभर कोटींच्या घरात होईल, अशी शक्यता बिकानेर स्विट्सचे भागीदार अमित अग्रवाल यांनी व्यक्त केली आहे. श्रींची आरास सजावट आणि वाहण्यासाठी फुले मोठ्या प्रमाणात वापरली जातात. सध्या विविध रंगांच्या आणि सुगंधांच्या फुलांपासून आरास सजावट पसंतीची आहे. हा बाजार सुमारे ५० कोटींच्या घरात जाईल, अशी शक्यता दादर फुल मार्केटमधील व्यापारी विजय ढमाले यांनी व्यक्त केली.

फुलांच्या मागणीत पाचपटीने वाढ
परळ येथील फुलांचे व्यापारी मुकुंद पवार यांनी सांगितले की, ‘पुढील ११ दिवसांत जवळपास फुलांची मागणीत पाचपटीने वाढ होण्याची शक्यता आहे. २० ते ३० टन फुलांची आवक मुंबई परिसरात होते. बंगळूर, सांगली, सातारा या परिसरातून मुंबईत माल आयात केला जातो. या ११ दिवसांत पाच ते सहा कोटींची उलाढाल होण्याची शक्यता आहे. पहिल्या दोन दिवसांत सर्वाधिक फुलांची मागणी असते. मंडळ, घरगुती बाप्पा यासाठी शिवाय, सत्यनारायण पूजेसाठी तसेच घाऊक व्यावसायिकांच्या मागणीत तिप्पट वाढ होते.