उल्हासनगरात दिवसाढवळ्या दहशत

चाकूचा धाक दाखवत २१ हजारांची लूट
विठ्ठलवाडी पोलिसांचा गुन्हा दाखल
उल्हासनगर, ता. २५ (वार्ताहर) : कॅम्प ४ मधील शासकीय रुग्णालयाजवळ रिक्षाचालक व त्याच्या साथीदाराने प्रवाशांना चाकूचा धाक दाखवत तब्बल २१ हजार रुपयांची लूट केली. विठ्ठलवाडी पोलिसांनी अल्पावधीतच रिक्षाचालकाला जेरबंद केले. मात्र, मुख्य आरोपी फरार असून, पोलिस त्याचा शोध घेत आहेत.
उल्हासनगर कॅम्प क्रमांक ५च्या हिललाईन परिसरात राहणारे अजयकुमार गौतम व त्याचे तीन मित्र खरेदीसाठी विठ्ठलवाडी स्थानक परिसरात आले होते. खरेदी आटोपून ते श्रीराम चौकातून रिक्षाने कॅम्प ५ कडे परत जाताना शासकीय रुग्णालयाजवळ एक व्यक्ती रिक्षात बसला. रिक्षाचालक व त्याचा साथीदारांच्या संगनमताने रिक्षा एका अंधाऱ्या गल्लीत नेण्यात आली. तिथे दोघांनी प्रवाशांना चाकूचा धाक दाखवत मारहाण केली. त्यानंतर २१ हजार रुपयांची रोकड लंपास केली. विठ्ठलवाडी पोलिसांनी तातडीने तपास सुरू केला असून सीसीटीव्ही फुटेजचा अभ्यास करून पोलिसांनी चालकाला अटक केली. मुख्य आरोपी सध्या फरार असून, त्याच्या शोधासाठी पथके रवाना केली आहेत. गुन्ह्यात वापरलेली रिक्षा पोलिसांनी ताब्यात घेतली आहे. पुढील तपास वरिष्ठ पोलिस निरीक्षक अशोक कोळी यांच्या मार्गदर्शनाखाली सुरू आहे.