डायमंडच्या राजाचे थाटात आगमन

डायमंडच्या राजाचे थाटात आगमन
डोंबिवलीत गणेशभक्तांचा रिंगण सोहळा

डोंबिवली, ता. २५ : डोंबिवलीतील प्रसिद्ध श्री सिद्धिविनायक मित्र मंडळाच्या डायमंडच्या राजाचे रविवारी (ता.२४) थाटात आगमन झाले. या आगमन सोहळ्याची डोंबिवलीकर, गणेश भक्त आणि वारकरी उत्साहाने वाट पाहत होते. पारंपरिक पद्धतीने हा आगमन सोहळा पार पडला. टाळ-मृदुंग हातात घेतलेले वारकरी आणि उभे रिंगण हे या सोहळ्याचे विशेष आकर्षण ठरले.

डोंबिवली पूर्वेतील श्री सिद्धिविनायक मित्र मंडळाचा डायमंडचा राजा हा हिऱ्यांनी सजलेली बाप्पाची मनमोहक मूर्ती म्हणून प्रसिद्ध आहे. भाविक दरवर्षी या मंडळात गर्दी करतात. गेल्या वर्षी गंगा आरतीने राजाचे आगमन झाले होते, तर यंदा वारकरी संप्रदायाची दिंडी आणि उभे रिंगण सोहळा आयोजित करण्यात आला.

रविवारी सायंकाळी कावेरी चौकात पार पडलेल्या उभ्या रिंगण सोहळ्याला भाविकांनी मोठी गर्दी केली. उभे रिंगण हा सोहळा प्रामुख्याने संत तुकाराम महाराज, संत माऊली यांच्या पालखी सोहळ्यात पाहायला मिळतो, विशेषतः पंढरपूरच्या वारीत. मात्र शहरातील भाविकांना हा अनुभव फारसा मिळत नसतो. सिद्धीविनायक मंडळाने या परंपरेचा अनुभव देत हा रिंगण सोहळा आयोजित केल्याने नागरिकांनी तो पाहून आनंद व्यक्त केला.सोहळ्यात टाळ-मृदंगांचा गजर आणि विठ्ठलनामाचा तसेच गणरायाचा जयघोष झाला.