डोंबिवलीत ज्वेलर्समध्ये चोरी

डोंबिवलीत ज्वेलर्समध्ये चोरी
भिंतीला भगदाड पाडून पाच लाखांचे दागिने लंपास
सकाळ वृत्तसेवा
डोंबिवली, ता. २५ : सागाव परिसरातील ‘चंदन ज्वेलर्स’ या दागिन्यांच्या दुकानात शुक्रवारी (ता.२२) मध्यरात्री चोरीची घटना घडली. चोरट्यांनी दुकानाच्या भिंतीला भगदाड पाडून आत प्रवेश केला आणि सुमारे पाच लाख रुपये किमतीचे दागिने चोरून पसार झाले. ही घटना दुकानातील सिसीटीव्ही कॅमेऱ्यात कैद झाली असून, फुटेजच्या आधारे चोरट्यांचा शोध मानपाडा पोलिसांकडून सुरू आहे. पोलिसांनी दिलेल्या माहितीनुसार चोरट्यांनी पूर्वनियोजित पद्धतीने दुकानाच्या मागील बाजूची भिंत फोडून आत प्रवेश केला. त्यानंतर दुकानातील अलमारीतील दागिने चोरून प्रत्यक्ष घटनास्थळावर कोणताही मोठा आवाज न करता चोरी केली. या घटनेमुळे परिसरात भीतीचे वातावरण पसरले असून, व्यापाऱ्यांनी रात्रीच्या सुरक्षेबाबत चिंता व्यक्त केली आहे. पोलिसांनी गुन्हा नोंदवून तपास सुरू केला असून, लवकरच चोरट्यांना अटक करण्यात येईल, असा विश्वास पोलिसांनी व्यक्त केला आहे.