मुंबई-मडगाव वंदे भारत एक्सप्रेस आज कोकणात दाखल

कोकणातील जलद प्रवासाची स्वप्नपूर्ती
गणेशोत्सवासाठी १६ डब्यांची मुंबई-मडगाव रवाना
रोहा, ता. २५ (बातमीदार)ः गणेशोत्सवासाठी कोकणला जाणाऱ्या प्रवाशांसाठी मुंबई ते मडगाव वंदे भारत एक्स्प्रेस १६ डब्यांसह कोकणात दाखल झाली. मुंबईवरून ही गाडी कोकणाच्या दिशेने रवाना झाल्याने कोकणातील जलद प्रवासाची स्वप्नपूर्ती झाली आहे.
मुंबई-मडगाव वंदे भारत एक्स्प्रेस सुरू झाल्यापासूनच प्रवाशांचा प्रचंड प्रतिसाद मिळत आहे. ही गाडी नेहमीच पूर्ण क्षमतेने धावत असल्याने कोकण विकास समितीने वेळोवेळी ही गाडी १६ किंवा २० डब्यांची चालवावी, अशी मागणी केली होती. यासाठी कोकण विकास समितीने सातत्याने पाठपुरावा केला होता. अखेर त्याला यश आल्याने या कालावधीत ही गाडी आठ ऐवजी १६ डब्यांसह धावणार आहे. यामुळे मुंबई-गोवा प्रवासासाठी वंदे भारत एक्स्प्रेसमध्ये अधिक जागा उपलब्ध होणार असून, सहा दिवसांत वंदे भारतच्या सहा फेऱ्या धावणार आहेत.
--------------------------
पनवेल येथे थांबा
गणेशोत्सव आठ ऐवजी १६ डब्यांची वंदे भारत एक्स्प्रेस चालवण्याचा निर्णय कोकणातील प्रवाशांसाठी महत्त्वाचा ठरला आहे. यामुळे अनेक प्रवाशांना वंदे भारत एक्स्प्रेसचे तिकीट बुकिंग करणे सोपे होणार आहे. या गाडीला पनवेलनंतर थेट चिपळूण येथे थांबा देण्यात आला आहे.