महापालिकेसाठी मोर्चेबांधणी

महापालिकेसाठी मोर्चेबांधणी
मनसे-राष्ट्रवादीचे माजी नगरसेवक शिवसेनेत
सकाळ वृत्तसेवा
डोंबिवली, ता. २५ : आगामी कल्याण-डोंबिवली महापालिका निवडणुकीच्या पार्श्वभूमीवर राजकीय हालचालींना वेग आला असून मोठ्या प्रमाणात पक्षांतर सुरू झाले आहे. मनसेचे माजी नगरसेवक राजन मराठे, त्यांच्या पत्नी ज्योती मराठे, तसेच राष्ट्रवादीचे माजी नगरसेवक बाबाजी पाटील यांनी शिवसेना शिंदे गटात प्रवेश केला आहे. यांच्यासह शेकडो समर्थकांनीही शिवसेनेचा भगवा झेंडा हाती घेतला. हा पक्षप्रवेश राज्याचे उपमुख्यमंत्री एकनाथ शिंदे, खासदार डॉ. श्रीकांत शिंदे आणि आमदार राजेश मोरे यांच्या उपस्थितीत ठाण्यातील निवासस्थानी झाला.

राजन मराठे आणि ज्योती मराठे हे दोघेही डोंबिवलीतील माजी नगरसेवक असून त्यांनी मनसेला सोडचिठ्ठी दिली. बाबाजी पाटील, ज्यांनी २०१९ मध्ये डॉ. श्रीकांत शिंदे यांच्या विरोधात लोकसभा निवडणूक लढवली होती, त्यांनीही आता शिवसेनेत प्रवेश केला. त्यांच्या समवेत अनेक स्थानिक पदाधिकारी व कार्यकर्त्यांनी देखील पक्षप्रवेश केला.
आम्ही कधीही विकासात राजकारण केले नाही. शिवसेनेच्या माध्यमातून संपूर्ण राज्यात महत्त्वाकांक्षी विकासकामे सुरू आहेत. लोकांना विकास पाहिजे, यात वाद नाही. म्हणूनच लोक मोठ्या संख्येने शिवसेनेत प्रवेश करत आहेत. असे सांगत उपमुख्यमंत्री एकनाथ शिंदे यांनी पक्षात प्रवेश केलेल्या पदाधिकाऱ्यांचे स्वागत केले.

पक्षप्रवेशामुळे कल्याण-डोंबिवलीतील राजकीय समीकरणे बदलण्याची शक्यता निर्माण झाली आहे. शिवसेना शिंदे गटाने महापालिका निवडणुकीपूर्वीच आपली ताकद वाढवण्याचा प्रयत्न सुरू केला आहे.