कामगारांचा संभ्रम दूर करण्याची कामगार सेनेची मागणी

कामगारांचा संभ्रम दूर करण्याची कामगार सेनेची मागणी
मुलुंड, ता. २५ (बातमीदार) ः कामगार संघटना आणि ॲक्शन कमिटी यांचा आयुक्तांसोबत केलेला करार समाजमाध्यमांवर प्रसारित झाल्यामुळे याविरोधात सफाई कामगार, अधिकाऱ्यांमध्ये तीव्र नाराजी पसरली आहे. या कराराविरोधात महापालिकेच्या घनकचरा व्यवस्थापन खात्यासह इतर विभागातील चौक्यांवर तीव्र आंदोलने व निदर्शने केली जात आहेत. परिणामी, यामुळे औद्योगिक शांतता भंग पावत आहे.
या पार्श्वभूमीवर कामगार सेना अध्यक्ष बाबा कदम यांनी आयुक्त भूषण गगराणी यांच्याकडे लेखी निवेदनाद्वारे या करारातील परिशिष्ट चार आणि नऊ वरील आपत्ती नोंदवली आहे. परिशिष्ट चारमध्ये मोटर लोडर संवर्गातील ७० ते ७५ टक्के कामगारांना त्यांच्या सध्याच्या कामाशी सुसंगत काम देण्यात येईल, असे नमूद असले तरी, त्याविषयी स्पष्टता नसल्यामुळे कामगार संभ्रमित झाले आहेत. यामुळे योग्य खुलासा करावा, अशी मागणी कामगार सेनेचे अध्यक्ष बाबा कदम यांनी केली आहे.
याशिवाय, परिशिष्ट नऊमध्ये नमूद केलेली याचिका कामगार सेनेच्या वतीने कुठल्याही न्यायालयात दाखल करण्यात आलेली नसल्यामुळे तो मुद्दा आमच्या युनियनला लागू नाही, असेही कदम यांनी स्पष्ट केले. या अनुषंगाने करारासंदर्भात पुनर्विचार करण्यासाठी योग्य वेळ देण्यात यावी, असेही त्यांनी म्हटले आहे.