मोतिलाल नगरवासियांचे आंदोलन

म्हाडाच्या वाढीव कराविरोधात मोतिलाल नगरवासियांचे आंदोलन
मुंबई, ता. २५ : गोरेगावातील मोतीलाल नगरवासियांना कोणतीही पूर्वसूचना न देता म्हाडाने जुलै महिन्याच्या सेवा करापोटी ३५ हजार ते ४५ हजार रुपयांचे बिल पाठवले आहे. याच्या निषेधार्थ रहिवाशांनी शुक्रवारी (ता.२२) तीव्र आंदोलन केले.
जनकल्याणकारी समिती, मोतीलाल नगर रहिवासी विकास संघ आणि मोतीलाल नगर पुनर्विकास समन्वय समिती यांच्या सदस्यांनी हे ठिय्या आंदोलन केले. माधवी राणे, गौरव राणे आणि वरील संघटनांच्या अन्य पदाधिकाऱ्यांच्या नेतृत्वाखाली गोरेगाव मिळकत व्यवस्थापक विवेक गायधने यांच्या कार्यालयात आंदोलन करण्यात आले. गायधने हजर नसल्यामुळे सहमुख्याधिकारी वंदना सूर्यवंशी यांनी शिष्टमंडळाला भेटीसाठी बोलावून घेतले. वाढीव सेवाशुल्क कसे आले, का आले याचा अहवाल तयार करण्याचा आदेश देऊन लवकरच याप्रश्नी बैठक घेण्याचे आश्वासन त्यांनी दिले, अशी माहिती माधवी राणे यांनी दिली आहे.