नाशिक ढोल पथकांने बाप्पाचे स्वागत

नाशिक ढोल पथकांने बाप्पाचे स्वागत
मंडळांची पारंपरिक बँजो वादक पथकाला पसंती
ठाणे शहर, ता. २५ (बातमीदार) : गणेशोत्सवाच्या पार्श्वभूमीवर ठाण्यात बँजो आणि नाशिक ढोल पथकांना मोठ्या प्रमाणावर मागणी वाढली आहे. गणेशमूर्तींच्या आगमनासाठी वाजतगाजत स्वागत करण्याची तयारी सार्वजनिक मंडळे आणि घरगुती गणपती बसवणारे भाविक करत आहेत. पोलिसांनी डीजेला बंदी घातल्यामुळे पारंपरिक ढोल-ताशा, बँजो, नाशिक ढोल व पुणेरी ढोल वाजवणाऱ्या पथकांना अधिक पसंती दिली जात आहे. ठाण्यातील रुद्र ढोल, शंभूराजे ढोल यांसारखी पथकेही सज्ज झाली आहेत. पुणे, नाशिक, मुंबई येथूनदेखील अनेक पथके ठाण्यात दाखल झाली आहेत. काही महिन्यांपासून हे पथक वादन सराव करत होते.

सार्वजनिक मंडळांकडून बँजो पथकासाठी २५ ते ३० हजार रुपये, तर घरगुती गणपतीसाठी १५ ते १७ हजार रुपये इतका दर आकारला जात आहे. यंदा मागणी वाढल्याने गेल्या वर्षीच्या तुलनेत दरात हजार-दोन हजार रुपयांची वाढ झाली आहे. ठाण्यात सध्या २००हून अधिक बँजो आणि नाशिक ढोल पथके सक्रिय आहेत. पावसामुळे काही भागांतून पथके कमी प्रमाणात आल्याचे सांगण्यात येत आहे, मात्र ठाण्यातील स्थानिक पथकांची संख्या वाढल्याने गणेश मंडळांना पुरवठा सुरळीत राहणार असल्याचे स्पष्ट झाले आहे.

गेल्या काही वर्षांत गणेश उत्सवासाठी पुणेरी ढोल पथक ठाण्यात येते. ठाण्यामध्ये रुद्र ढोल वादक, शंभूराजे ढोल वादक अशी पुणेरी ढोल पथके तयार झाल्याने ठाण्यातील गणेश मंडळांची अडचण दूर झाली आहे; मात्र ठाण्यातील वाहतूक कोंडी रस्ते यांची परिस्थिती पाहता मोठ्या मंडळाकडूनही बँजो घटकाला पसंती दिली जात असल्याचे मंडळाचे म्हणणे आहे. बँजो पथकासाठी सार्वजनिक मंडळाकडून २५ ते ३० हजार रुपये रुपयांचा भाव सुरू असून, घरगुती गणपतीसाठी १५ ते १७ हजार रुपये घेतले जात असल्याचे दुर्गा म्युझिकलचे मालक आनंद चव्हाण यांनी सांगितले.

यंदा ठाण्यात गणेशोत्सवाचा उत्साह असल्याने वाजंत्र्यांना मागणी वाढली आहे. गेल्या वर्षापेक्षा यंदा हजार ते दोन हजार रुपये वाढवून दिले जात आहेत. ठाण्यात बँजो पथकाला मोठी मागणी आहे. ठाण्यात २०० हून अधिक बँजो आणि नाशिक बाजा पथक आहे. घरगुती गणपती बसवणाऱ्यांकडूनही अशा बाजांची मागणी वाढल्याने यांना वाजंत्र्यांना चांगले दिवस आल्याचे दिसते.
- सागर येडे, संचालक जिवलग बिट्स, भीमनगर, ठाणे