समाज घडविणारे शिक्षक व्हायला पाहिजे : गीतांजली शेळके

समाज घडविणारे शिक्षक व्हायला पाहिजे : गीतांजली शेळके
भारतीय विरांगना या पुस्तकाचे प्रकाशन
मुंबई, ता. २५ ः शिक्षक आणि पालक यांच्यासमोर प्रचंड आव्हाने आहेत, त्या आव्हानांना सामोरे जाण्यासाठी आपण आपल्या दैनंदिनीवर लक्ष केंद्रित करायला हवे. ज्यांच्यामुळे प्रेरणा मिळेल अशा माणसांचे आयुष्य आपण समजून घ्यायला हवे, असे प्रतिपादन जी. एस. महानगरच्या अध्यक्षा गीतांजली शेळके यांनी व्यक्त केले.
‘सकाळ प्रकाशन’ प्रकाशित आणि श्रद्धा रोहोकले लिखित ‘भारतीय वीरांगना’ या पुस्तकाचे प्रकाशन माटुंगा येथील मुंबई पब्लिक स्कूल येथे झाले. या वेळी संतसाहित्याचे अभ्यासक डॉ. रफिक सय्यद, पोलिस उपायुक्त गणेश गावडे, प्रशासकीय अधिकारी किसनराव पावडे, साहेबराव ठाणगे, डॉ. नितीन पवार, डॉ. प्रफुल्ल आवटे, सुधाकर रोहोकले, बाळासाहेब शिंदे, महादेव वराळ यांच्यासह इतर मान्यवर उपस्थित होते. रोहोकले यांनी त्यांच्या शिक्षकी पेशातून येणारे अनुभव ‘भारतीय वीरांगना’ या पुस्तकाच्या माध्यमातून मुलांसाठी आणि सामान्य वाचकांसाठी मांडले आहेत, याची समाजाला गरज आहे. आपल्या भारतीय स्त्रियांनी जे कर्तुत्व केले ते या पुस्तकातून त्यांनी अतिशय उत्तमपणे मांडले आहे.’ असे शेळके यांनी मत व्यक्त केले.
संतसाहित्याचे अभ्यासर रफिक सय्यद म्हणाले, ‘माणूस घडणे ही खूप महत्त्वाची गोष्ट आहे. सद्भावना, बंधुत्व, समता ही मूल्ये आजच्या समाजात रुजणे ही काळाची गरज आहे. आजच्या समाजात भेदाचे जे विभाजन आहे ते दूर व्हायला हवे. विज्ञान आणि अध्यात्म हे विभाजन दूर करायला नक्की मदत करेल. हल्लीच्या मुलांमध्ये वाचनाची आवड निर्माण करण्यासाठी मी काही निवडक भारतीय स्त्रियांच्या गोष्टी सोप्या भाषेत मांडल्या, मुलांना त्यांची ओळख होऊन ते त्यांच्यापासून प्रेरणा घेतील हा हेतू त्यामागे असल्याचे लेखिका रोहोकले यांनी आपल्या मनोगतात सांगितले. या कार्यक्रमात अनेक मान्यवर शिक्षकांना पुरस्कार देण्यात आले. कार्यक्रमाचे सूत्रसंचालन मारुती शेरकर यांनी केले आणि आभार प्रदर्शन भाऊसाहेब आहेर यांनी केले.