उल्हासनगरात मराठा समाजाच्या सांस्कृतिक भवनासाठी हालचाली,

मराठा समाजाच्या सांस्कृतिक भवनासाठी हालचाली
उल्हासनगर, ता. २६ (बातमीदार) ः शहरात मोठ्या प्रमाणात मराठा समाजाचे वास्तव्य असून, त्यांच्यासाठी उल्हासनगरात सांस्कृतिक भवन उभारण्यासाठी जागा आणि निधी उपलब्ध करून देण्याची मागणी मराठा विकास सामाजिक संस्थेचे अध्यक्ष प्राध्यापक व्ही. व्ही. पाटील यांच्या शिष्टमंडळाने केली आहे. यासंबंधित खासदार डॉ. श्रीकांत शिंदे यांना निवेदनही दिले आहे.
या मागणीला शिंदे यांनी सकारात्मक प्रतिसाद दिला असून, सांस्कृतिक भवनासाठी पाच कोटी रुपयांचा निधीचे आश्वासन दिले आहे. त्यामुळे सांस्कृतिक भवनाच्या हालचालींना गती मिळण्याच्या अपेक्षा वाढल्या आहेत.
शिवसेनेचे महानगरप्रमुख राजेंद्र चौधरी यांच्या पुढाकाराने व्ही. व्ही. पाटील, सल्लागार दिलीप गायकवाड, युवासेना बाळा श्रीखंडे, शांताराम ढोकळे पाटील, अनिल पावशे, ज्ञानेश्वर करवंदे, भारत मोटकर, उमेश चाचड, सुधीर कान्हेरे आदींनी चालिया पर्वात सिंधी समाजाचे दैवत असलेले झुलेलाल यांच्या दर्शनासाठी आलेले श्रीकांत शिंदे यांची भेट घेऊन त्यांच्याकडे मराठा सांस्कृतिक भवनासाठी साकडे घातले. या वेळी जिल्हाप्रमुख गोपाळ लांडगे, टीओके प्रमुख ओमी कलानी, युवासेना शहर अध्यक्ष पूर्व सुशील पवार उपस्थित होते.
सांस्कृतिक भवनात मराठा समाजातील गरजूंना सोयी उपलब्ध करून देता येतील. सारथी आणि अण्णासाहेब पाटील आर्थिक विकास महामंडळ यांचे मार्गदर्शन केंद्र, स्पर्धापरीक्षा मार्गदर्शन केंद्र आणि गरजवंत मराठ्यांच्या मुलांसाठी वसतिगृह आणि त्याच्या सामाजिक, शैक्षणिक, सांस्कृतिक उपक्रम घेण्यासाठी जागा उपलब्ध होऊ शकेल, अशी मागणी निवेदनात करण्यात आली आहे.