किरकोळ वादातून तरुणाला बेदम मारहाण

तारापूर (बातमीदार) : बोईसर परिसरातील एका हॉटेलजवळ किरकोळ वादातून तरुणाला जबर मारहाण करण्यात आली. या मारहाणीत तरुण गंभीर जखमी झाला असून त्याच्यावर खासगी रुग्णालयाच्या अतिदक्षता विभागात उपचार सुरू आहेत. या प्रकरणी बोईसर पोलिस ठाण्यात दोन व्यक्तींविरोधात गुन्हा दाखल करण्यात आला आहे.

बोईसर परिसरातील पनारा हॉटेलमध्ये रविवारी (ता. २४) रात्री मद्य घेण्यासाठी गेलेल्या निखिल शर्मा (वय ३४) याला गाडी लावण्याच्या शुल्लक वादातून एका तरुणाने डोक्यात लाकडी वस्तूने प्रहार केला. तसेच सोबत असलेल्या तरुणीने भांडण सोडवण्यासाठी आलेला दीपक शर्मा याच्या डोळ्यात मिरचीची पूड फेकली. या मारहाणीत निखिल याच्या डोक्याला मार लागल्याने गंभीर जखमी झाला असून त्याच्यावर प्रथम बोईसर येथील खासगी रुग्णालयात उपचार करण्यात आले, मात्र त्याची स्थिती गंभीर असल्याने त्याला वापी येथील रुग्णालयात नेण्यात आले आहे. याप्रकरणी अज्ञात तरुण आणि तरुणीविरोधात गुन्हा नोंद करण्यात आला आहे.