विक्रमगड परिसरात हरितालिका उत्साहात साजरी

विक्रमगड, ता. २६ (बातमीदार) : विक्रमगड परिसरात हरितालिका सण आज (ता. २६) मोठ्या उत्साहात साजरा करण्यात आला. महिलावर्ग सकाळपासूनच पूजा करण्यासाठी घराबाहेर पडल्या होत्या. तालुक्यातील विविध मंदिरात एकाचवेळी विविध पूजा होतील, अशी व्यवस्था केली होती. त्यामुळे महिलांची गर्दी झाली. त्यांना जास्त वेळ ताटकळत राहावे लागणार नव्हते. दुपारी १ वाजेपर्यंत हरितालिकेची पूजा सुरू होती.

हरितालिकेचे व्रत अतिशय पवित्र आणि मांगल्याचे मानले जाते. या व्रतासाठी एक दिवस अगोदरपासूनच विविध झाड-फुलांची पत्री जागवून ती वाहण्याची पूर्वापार प्रथा असल्याने ती जपण्यासाठी महिलावर्ग कामाला लागल्याचे चित्र पाहावयास मिळाले. या दिवशी पूर्ण दिवस उपवास ठेवतात. या दिवशी स्त्रिया देवळात जाऊन आपल्या पतीला दीर्घायुष्य लाभावे यासाठी, तर नवयुवती आपल्याला मनासारखा पती मिळावा यासाठी पूजा करून हे व्रत पूर्ण करतात.