गणेशोत्सवावर तिसऱ्या डोळ्याची नजर

गणेशोत्सवावर तिसऱ्या डोळ्याची नजर
खारघरमध्ये ८ हजार घरगुती गणपतींची प्रतिष्ठापना
खारघर, ता.२८ (वार्ताहर): परिसरात यंदा तब्बल ८ हजार घरगुती गणपतींचे विराजमान झाले आहेत. त्यासोबतच ४० गृहनिर्माण सोसायट्या आणि ३२ सार्वजनिक गणेश मंडळांनी बाप्पाची स्थापना केली आहे. या मंडळांच्या सुरक्षेसाठी सीसीटीव्ही कॅमेरे, सुरक्षा रक्षकांची नेमणूक केली आहे.
खारघर पोलिसांच्या सूचनेनुसार सर्व गणेश मंडप परिसरात सीसीटीव्ही बसवण्यात आले आहेत. गर्दीच्या पार्श्वभूमीवर सुरक्षा रक्षक नेमल्यामुळे नागरिकांना निर्धास्तपणे उत्सवाचा आनंद घेता येणार आहे. पालिका प्रशासनाने खारघरगाव, बेलपाडा, पापडीचा पाडा, मुर्बी गाव व विविध सेक्टरमध्ये उभारलेल्या कृत्रिम तलाव विसर्जन स्थळांवर मंडप, टेबल, विद्युत व्यवस्था, ध्वनीप्रक्षेपक (स्पीकर) यांची सोय केली आहे. तसेच सुका व ओला निर्माल्य वेगळे करण्यासाठी स्वतंत्र व्यवस्था करण्यात आली आहे. गणेशोत्सव साजरा करताना नागरिकांनी शिस्त व संयम पाळावा, तसेच इतरांना त्रास होणार नाही याची काळजी घ्यावी, असे आवाहन खारघर पोलिसांकडून करण्यात आले आहे.
--------------------------------
पोलिसांकडून विशेष दक्षता
तळोजा पोलिस ठाणे हद्दीतील गाव तसेच सिडको वसाहतींमध्ये गणेशोत्सवाचा उत्साह आहे. यंदा ३५ सार्वजनिक गणेशोत्सव मंडळे ३,२०० घरगुती गणेशमूर्तींची स्थापना करण्यात आली आहे. तळोजा, नावडे वसाहतीसह २८ गावे हद्दीत येतात. वाढत्या वसाहतींमुळे गणेशोत्सव अधिक भव्य होत असल्याचे चित्र दिसून येते. उत्सव काळात नागरिकांना कोणताही त्रास होऊ नये, यासाठी पोलिसांकडून दक्षता घेण्यात येत आहे.