गणेशोत्सवात घुमणार भजनी बोंगोचा आवाज

गणेशोत्सवात घुमणार भजनी बोंगोचा आवाज
प्रभादेवी, ता. २८ : सण-उत्सवात वाद्यांना खूप महत्त्व असते. धार्मिक उत्सवात पारंपरिक वाद्यांना सर्वात जास्त मागणी असते. यंदा गणेशोत्सव मोठ्या थाटामाटात साजरा होत असल्याने ढोलकीसह ढोलकीसारखीच वाजणाऱ्या ‘भजनी बोंगो’ला सर्वाधिक पसंती मिळत आहे.
आजच्या प्रगत आणी डिजिटल युगातही ढोलकीच्या तालावर तरुणाई बेभान होऊन नाचताना पाहायला मिळते. यंदा भजनी बोंगो हे नवीन वाद्य बाजारात विक्रीसाठी आले असून, घरगुती गणेश, गणेश मंडळांची याला सर्वाधिक पसंती मिळत आहे. यावर्षी भजनी बोंगो हे नवीन वाद्य तयार करण्यात आले असून, आतापर्यंत १५० भजनी बोंगोंची विक्री झाली आहे. २५० हून अधिक ढोलकीची विक्री करण्यात आल्याचे दादर येथील ईश्वरलाल छोटालाल तबला मर्चंटचे मालक अतुल चौहान यांनी सांगितले. या भजनी बोंगोची किंमत ३,५०० रुपये असून, ढोलकीची किंमत ४,५०० पासून आठ हजारांपर्यंत आहे, तर तबल्याची किंमत ८.५०० एवढी आहे.
या भजनी बोंगोला सध्या परदेशातही खूप मागणी असून, अमेरिका, लंडन, जर्मनी, ब्राझील या देशातदेखील पाठविण्यात आले आहेत. वर्षभरात ढोलकीची ५०० हून अधिक विक्री होते. सिंधुदुर्ग, रत्नागिरी, लांजा, खेड, पुणे याठिकाणीदेखील ढोलकी पाठविली जात असून, काही सेलिब्रिटीदेखील वाद्य खरेदीसाठी येत असल्याचे अतुल यांनी सांगितले. गेल्या दोन वर्षांच्या तुलनेत यावर्षी ढोलकीला जास्त खप झाल्याचे दुकानदारांनी सांगितले.