पोलिस असल्याचे सांगून वृद्धेला लुबाडले

पोलिस असल्याचे सांगून वृद्धेला लुबाडले
दोन लाखांची सोनसाखळी लंपास
सकाळ वृत्तसेवा
ठाणे, ता. २८ : पोलिस असल्याचे भासवत आणि चौकशीच्या नावाखाली वृद्ध महिलेला गंडवून गळ्यातील सोन्याची तुळसीमाळ चोरून नेल्याची धक्कादायक घटना कळवा परिसरात मंगळवारी (ता. २६) रोजी घडली. या फसवणुकीत महिलेला दोन लाख ४० हजार रुपयांची आर्थिक फटका बसला असून, याप्रकरणी कळवा पोलिस ठाण्यात गुन्हा दाखल केला आहे.

पारसिकनगर, कळवा येथे राहणाऱ्या मंगल निकम (वय ६५) या महिला सकाळी शिवमंदिरात दर्शनासाठी गेल्या होत्या. दर्शन करून परत येत असताना रस्त्याच्या कडेला रेनकोट घालून उभ्या असलेल्या दोन जणांनी त्यांना थांबवले. त्यातील एकाने स्वतःला पोलिस असल्याचे सांगितले आणि म्हणाले, सोन्याचे दागिने घालून फिरू नका, चौकशी चालू आहे. याचवेळी एक तिसरा व्यक्ती दुचाकीवर बसलेला होता. ‘‘तुमच्या गळ्यात सोनं आहे का,’’ असा प्रश्न करत त्यांनी तुळसीमाळ दाखवण्यास सांगितले. त्यांनीही विश्वासाने गळ्यातील ३० ग्रॅम वजनाची, दोन पदरी सोन्याची तुळसीमाळ काढून दिली. त्या व्यक्तीने माळ पाहून ती प्लॅस्टिकच्या पिशवीत ठेवली, गाठ मारली आणि परत दिल्याचे नाटक केले, मात्र नंतर लक्षात आले की त्या पिशवीत खोटी वस्तू होती आणि खरी माळ हातचलाखीने लंपास करण्यात आली होती.

या घटनेनंतर वृद्ध महिलेने कळवा पोलिस ठाण्यात धाव घेत तक्रार दाखल केली. सध्या वरिष्ठ पोलिस निरीक्षक अशोक उतेकर यांच्या मार्गदर्शनाखाली गुन्हेगारांचा शोध सुरू असून, परिसरातील सीसीटीव्ही फुटेज तपासले जात आहेत. तसेच पोलिस स्वतःहून नागरिकांकडे दागिने काढण्यास सांगत नाहीत. कोणतीही शंका आल्यास तत्काळ जवळच्या पोलिस ठाण्याशी संपर्क साधा असे आवाहन पोलिसांनी केले आहे.