बाधितांच्या पंचनाम्याला सुरुवात

बाधितांच्या पंचनाम्याला सुरुवात
माजी आमदार क्षितिज ठाकूर यांच्या प्रयत्नाला यश
विरार, ता. २८ (बातमीदार) : मुसळधार पावसामुळे शहरातील अनेक भागांत जनजीवन विस्कळित झाले. अनेक घरांत पाणी शिरले. रहिवासी, बागायतदार यासह मच्छीमार बांधवांचे आर्थिक नुकसान झाले. त्यामुळे नुकसानग्रस्त नागरिकांना शासनाने मदत करावी, यासाठी बहुजन विकास आघाडीचे माजी आमदार क्षितिज ठाकूर यांनी मुख्यमंत्री देवेंद्र फडणवीस, उपमुख्यमंत्री अजित पवार व पालकमंत्री गणेश नाईक यांच्याकडे मागणी केली होती. या मागणीला यश आले असून, ठिकठिकाणी पंचनामा करण्यास तहसील विभागाने सुरुवात केली आहे.
पालघर जिल्ह्यात अतिवृष्टीमुळे व्यापारी, कारखानदार तसेच मच्छीमार, बागायतदार शेतकऱ्यांचे प्रचंड आर्थिक नुकसान झाले आहे. त्यामुळे प्रशासनाने लवकर पंचनामे करून कार्यवाही सुरू करावी, अशी विनंती केली. अतिवृष्टीच्या काळात बहुजन विकास आघाडी, महापालिका व जीवदानी मंदिर ट्रस्टतर्फे जेवणाची व्यवस्थादेखील करण्यात आली होती. कार्यकर्त्यांनी घरोघरी जाऊन नागरिकांना जेवण दिले. माजी आमदार क्षितिज ठाकूर यांनी अनेक भागांत दौरे करून समस्या सोडविण्यास प्राधान्य दिले तसेच नुकसानभरपाईची मागणी केली.