सरावली मेरिपाड कॉरिडॉर येथे रेल्वेचे काम पुन्हा सुरु

सरावली मेरिपाड कॉरिडॉर येथे रेल्वेचे काम पुन्हा सुरू
कासा, ता. २८ (बातमीदार) : डहाणू विधानसभा क्षेत्रातील सरावली मेरिपाड कॉरिडॉर येथे रेल्वे जमीन अधिग्रहणामुळे उद्भवलेला जमीनमालक व कब्जेदार यांच्यातील मोबदल्याचा वाद अखेर सुटला असून, थांबलेले रेल्वे काम आजपासून पुन्हा गतिमान झाले आहे.
मंगळवारी (ता. २८) बाधित शेतकऱ्यांनी सभा आयोजित करून मोबदल्यावरून आपली नाराजी व्यक्त केली होती. वाद वाढल्याने कॉरिडॉरवरील रेल्वेचे काम काही दिवस ठप्प झाले होते. डहाणूचे आमदार विनोद निकोले व संबंधित अधिकाऱ्यांनी प्रत्यक्ष ठिकाणी भेट देऊन जमीनमालक आणि कब्जेदार यांच्याशी सविस्तर चर्चा केली. चर्चेनंतर सुवर्णमध्य काढत दोन्ही पक्षांना मोबदल्याचे वाटप करण्याचे आदेश देण्यात आले. त्यामुळे भविष्यात कोणतेही वाद न उभे राहता रेल्वे काम सुरळीत सुरू राहील, ही महत्त्वाची बाब मानली जात आहे. या वेळी तालुका सेक्रेटरी कॉम्रेड रडका कलांगडा, महाराष्ट्र राज्य किसान सभा कार्याध्यक्ष कॉम्रेड चंद्रकांत घोरखाना, जनवादी महिला संघटना सचिव कॉम्रेड लहानी दौडा, अप्पर जिल्हाधिकारी महेश सागर, राठोड, भूमी अभिलेख अधिकारी महेश टिके आदी मान्यवरांसह स्थानिक नागरिक मोठ्या संख्येने उपस्थित होते.