बिश्नोई गॅंगला १.२७ कोटींची खंडणी दिल्याचा बनाव

व्यावसायिकाची फसवणूक; गुन्हा दाखल
बिश्नोई गॅंगला १.२७ कोटींची खंडणी दिल्याचा बनाव
सकाळ वृत्तसेवा
ठाणे, ता. २८ : ठाण्यातील व्यावसायिक अभिनव गर्जे यांची बिश्नोई गँगला खंडणी दिल्याचा बनाव करून १.२७ कोटी रुपयांची फसवणूक केल्याप्रकरणी दीपक रमन मलिक नावाच्या व्यक्तीवर गुन्हा दाखल करण्यात आला आहे. जून २०२३ ते मार्च २०२५ या कालावधीत ही घटना घडली.
गर्जे यांचे मित्र असलेल्या दीपक मलिक यांनी त्यांच्याकडून १.२७ कोटी रुपये कर्ज घेतले. तीन महिन्यांनंतर गर्जे यांनी पैशांची मागणी केली असता, मलिक यांनी स्वतः बिश्नोई गँगचा सदस्य लॉरेन्स बिश्नोई असल्याचा बनाव करत गर्जे यांच्याकडे ५० कोटी रुपयांची खंडणी मागितली आणि जीवे मारण्याची धमकी दिली.
या खंडणीतून सुटका करण्यासाठी मलिक यांनी गर्जे यांना दिल्लीला नेऊन ४० कोटी रुपयांची तडजोड केली. त्यानंतर गर्जे यांच्याकडून घेतलेले १.२७ कोटी रुपये खंडणी म्हणून बिश्नोई गँगला दिल्याचा बनाव करत, मलिक यांनी त्यांची फसवणूक केली. याप्रकरणी कापूरबावडी पोलिस ठाण्यात गुन्हा दाखल करण्यात आला असून, पोलिस अधिक तपास करत आहेत.