अनधिकृत भिंतीमुळे २२ वर्षीय तरुणाने जीव गमावला!

अनधिकृत भिंतीमुळे २२ वर्षीय तरुणाचा मृत्यू
प्रशासनाकडे तक्रारी करूनही कारवाई नाही; कुटुंबाचा आरोप
बदलापूर, ता. २८ (बातमीदार) : येथील वांगणीमधील कासगाव वाडीत सुरेश पारधी (वय २२) याचा दुचाकी अपघातात मंगळवारी (ता. २६) मृत्यू झाल्याची दुर्दैवी घटना घडली. रस्त्याच्या कडेला अनधिकृतपणे बांधलेल्या भिंतीमुळे हा अपघात घडल्याचा आरोप कुटुंबाने केला असून, या भिंतीसंदर्भात प्रशासनाकडे अनेक तक्रारी करूनही कोणतीही कारवाई झाली नसल्याचे त्यांनी सांगितले.
सुरेश पारधी मंगळवारी सकाळी साडेनऊ वाजण्याच्या सुमारास कामावर जात असताना, कासगाव वाडीतील रस्त्यावर दुसऱ्या वाहनाला रस्ता देण्यासाठी त्याने आपली गाडी बाजूला घेतली. त्या वेळी रस्त्यावरील चिखलामुळे त्याची दुचाकी घसरली आणि ती बाजूच्या अनधिकृत भिंतीवर आदळली. डोक्याला गंभीर दुखापत झाल्याने त्याचा जागीच मृत्यू झाला.
या रस्त्याच्या दोन्ही बाजूला सार्वजनिक बांधकाम विभागाने रस्ता बांधला आहे; मात्र संबंधित जागामालकाने प्रशासनाची कोणतीही परवानगी न घेता रस्त्याकडेला भिंत बांधली आहे. यामुळे पावसाचे पाणी वाहून जाण्यास जागा नसल्याने रस्त्यावर चिखल तयार होतो, ज्यामुळे दुचाकी घसरण्याचे अपघात वाढले आहे, असे स्थानिकांनी सांगितले.
गावकऱ्यांनी या भिंतीबद्दल ग्रामपंचायत, सार्वजनिक बांधकाम विभाग आणि तहसील कार्यालयात तक्रारी केल्या होत्या, पण कोणीही यावर कारवाई केली नाही, असा आरोप सुरेशच्या कुटुंबीयांनी केला आहे. त्यामुळे भिंत त्वरित पाडून नुकसानभरपाई द्यावी आणि दोषींवर कारवाई करावी, अशी मागणी त्यांनी केली आहे. मागणी पूर्ण न झाल्यास आंदोलन करण्याचा इशाराही दिला आहे.

आमचा हा नेहमीचा रस्ता आहे; मात्र या रस्त्याकडेला भिंत बांधल्यानंतर अनेकदा या ठिकाणी अपघात घडत आहेत. या भिंतीमुळेच माझ्या मुलाला तरुण वयात जीव गमवावा लागला. त्यामुळे संबंधित ठेकेदार आणि प्रशासनाने आम्हाला नुकसानभरपाई द्यावी व भविष्यात अशी घटना घडू नये, यासाठी ही भिंत त्वरित पाडावी.
-चंदर पारधी, सुरेश पारधी याचे वडील

सुरेश पारधी याचा अपघात या अनधिकृत भिंतीमुळे झाला आहे. संबंधित जागामालकाने प्रशासनाची कोणतीच परवानगी न घेता या ठिकाणी भिंत उभारली आहे. ही भिंत पाडण्यासाठी आम्ही सार्वजनिक बांधकाम विभाग, कासगाव ग्रामपंचायत, तहसीलदार कार्यालयात तक्रार अर्ज केलेला आहे. मात्र ग्रामपंचायत, तहसीलदार कार्यालयातून यासंदर्भात काही पाऊल उचललेले नाही. त्यामुळे सुरेश पारधी याच्या मृत्यूला संबंधित ठेकेदार आणि ग्रामपंचायत जबाबदार असून, त्यांच्यावर सदोष मनुष्यवधाचा गुन्हा दाखल करण्यात यावा.
- राकेश टेंबे, माहिती अधिकार कार्यकर्ता, वांगणी

आमच्या निदर्शनास आल्यानंतर आम्ही २ जुलै २०२५ रोजी या ठिकाणी बांधकाम करणाऱ्या संबंधित व्यक्तींना हे दगडी बांधकाम बंद पाडण्यासंदर्भात नोटिसा बजावण्यात आलेल्या आहेत.
- प्रशांतकुमार मानकर, उपअभियंता, सार्वजनिक बांधकाम विभाग